Në prag të hapjes së edicionit të ri të festivalit FemArt, grupi muzikor Shkodra Elektronike u mirëprit në një takim zyrtar nga kryetari i Prishtinës, Përparim Rama, raporton Katror.info.
Gjatë këtij takimi miqësor, kryetari Rama i dhuroi grupit simbolin kulturor më të njohur të vendit – Hyjneshën në Fron – si shenjë vlerësimi për punën e tyre artistike që ndërthur muzikën moderne me identitetin tonë të përbashkët kulturor.
“Kur përfaqësimi bëhet përmes artit që rrënjët i ka në shpirtin tonë kolektiv, atëherë jemi të gjithë bashkë, një zë, një ritëm, një emocion. Energjia e tyre, origjinaliteti dhe fuqia artistike janë frymëzim për të gjithë ata që e duan artin si formë identiteti,” shkruan Komuna e Prishtinës.
Mundesh me e lexu edhe…
Grupi, i njohur për qasjen e tyre unike muzikore që kombinon tinguj elektronikë me motive tradicionale shqiptare, do të performojë sonte në mbrëmje, më 16 qershor, në hapjen zyrtare të FemArt 2025 në Prishtinë.
Kjo pritje është edhe një dëshmi se Prishtina mbetet një qytet që e çmon artin si urë bashkëpunimi dhe frymëzimi, duke i dhënë hapësirë zërave që flasin ndryshe, por me shpirt të përbashkët./Katror.info
