“Kudo që performuan, sallat ishin plot”, shkruan One Future – The World Orchestra Festival në një postim kushtuar Orkestrës së Fëmijëve dhe të Rinjve “Amadeus” nga Prishtina, e cila fitoi Çmimin e Argjendtë në këtë festival prestigjioz të mbajtur në Vjenë nga 10–13 korrik 2025, shkruan Katror.info.
Ansambli i përbërë nga muzikantë të rinj të moshës 10 deri në 17 vjeç mori pjesë për herë të parë në festival, duke performuar në disa prej skenave më të njohura të kryeqytetit austriak, përfshirë Wiener Konzerthaus, Shtëpinë e Strauss-it dhe KulturGarage, për të kulmuar me finalen e madhe në Sallën e Artë krahas dhjetë orkestrave të tjera.
“Një moment i veçantë i performancave të tyre ishte paraqitja e kostumeve tradicionale unike. Çdo seksion i orkestrës përfaqësonte një rajon të ndryshëm të Kosovës, duke krijuar një pamje të gjallë dhe domethënëse të trashëgimisë kulturore të vendit të tyre,” thuhet në postim.
Mundesh me e lexu edhe…
Ata tërhoqën vëmendjen e të gjithëve me programin e përzgjedhur me kujdes. Luajtën pjesën e parë të Simfonisë së 45-të të Haydn-it, dhe bashkë me Adagion e pjesës së katërt, orkestrantët dolën nga skena një e nga një, për t’u rikthyer më pas madhërisht, të veshur krenarë me kostumet kombëtare të vendit të tyre, duke interpretuar “Malesorja” të Lorenc Antonit.
Në programin e tyre u përfshinë vepra nga kompozitorë të ndryshëm si Karl Jenkins (Palladio), Haydn (Simfonia nr. 45), Shostakoviç (Valsi nga Suíta e Xhazit), Mozart (Marshi në Re-Major K215), Anthony Hopkins (And the Waltz Goes On), Eugen Doga (Valsi i Gramafonit), Nino Rota (Love Theme nga Romeo dhe Zhulieta) dhe Lorenc Antoni (Malesorja).
“Nën udhëheqjen e dirigjentit Vehbi Shosholli dhe me përkushtimin e palodhur të drejtoreshës së orkestrës Hana Petrovci, e cila punoi shumë për ta sjellë orkestrën në Vjenë, këta muzikantë të rinj përfaqësuan me krenari zërin dhe kulturën e Kosovës në disa nga skenat më të njohura botërore.
Festivali One Future – The World Orchestra Festival, që zhvillohet në Vjenë me moton “One future, our better future”, synon të bashkojë orkestra të fëmijëve dhe të rinjve nga mbarë bota, duke u ofruar atyre skenën për të performuar, shkëmbyer përvoja dhe forcuar lidhjet ndërkulturore./Katror.info
Përgatiti:
