Projekti GENESIS, një nismë për të fuqizuar të rinjtë e Kosovës në industrinë kreative, është lansuar zyrtarisht në Prishtinë.
Ky projekt është një bashkëpunim ndërmjet Festivalit Anibar dhe Institutit Francez në Kosovë, me mbështetjen e Ministrisë për Evropë dhe Punë të Jashtme të Francës, thuhet në një Komunikatë për Media.
Në ceremoninë e lansimit morën pjesë figura të rëndësishme nga fusha e politikës dhe diplomacisë, duke përfshirë, kryeministrin e Kosovës Albin Kurti, ministrin e Kulturës, Rinisë dhe Sportit, Hajrulla Çeku, dhe Ambasadorin e Francës në Kosovë, Olivier Guérot.
Mundesh me e lexu edhe…
Projekti GENESIS synon të krijojë mundësi të reja për të rinjtë kosovarë që të zhvillojnë aftësitë e tyre në art dhe krijimtari, duke ndihmuar në ngritjen e kapaciteteve të sektorit kulturor në vend. Duke u fokusuar në edukim dhe fuqizim, ky projekt shërben si një platformë për të rinjtë që të përfitojnë nga përvoja ndërkombëtare, veçanërisht përmes lidhjeve të ngushta me partnerët francezë. Gjithashtu, nisma forcon marrëdhëniet kulturore mes Kosovës dhe Francës, duke e kthyer projektin në një urë të re bashkëpunimi ndërmjet dy vendeve.
Në fjalën e tij gjatë ceremonisë, kryeministri i Kosovës, Albin Kurti, theksoi rëndësinë e projekteve të tilla për zhvillimin e sektorit të kulturës dhe për të nxitur bashkëpunimin ndërkombëtar.
“Projekti GENESIS është një dëshmi e qartë se kultura jonë po shkon drejt pavarësisë dhe inovacionit,” tha ai.
Ai vlerësoi gjithashtu rolin e Ministrisë për Evropë dhe Punë të Jashtme të Francës dhe të Institutit Francez në mbështetjen e këtij projekti, duke shtuar se bashkëpunimi me Francën është thelbësor për zhvillimin kulturor të Kosovës.
Kryeministri Kurti shprehu përkushtimin e Qeverisë së Kosovës për të mbështetur artin e pavarur dhe për të rritur buxhetin për skenën kulturore. Ai theksoi miratimin e Ligjit të ri për Kulturën dhe rritjen e buxhetit për skenën e pavarur nga një milion euro në vitin 2019, në nëntë milionë euro aktualisht.
“Jemi të lumtur që Anibari është një nga organizatat e para që gëzon mbështetje institucionale për zhvillim organizativ me kohëzgjatje trevjeçare,” shtoi Kurti.
Në përfundim, Kurti vuri në dukje se Qeveria e Kosovës do të vazhdojë të punojë për zhvillimin e qëndrueshëm të sektorit kulturor dhe krijues si pjesë e rritjes kulturore dhe ekonomike të vendit. Ai njoftoi se gjashtë ministri kanë bashkuar forcat për hartimin e strategjisë së Ekonomisë Kreative, që do të rrisë potencialin kreativ të individëve dhe industrive kulturore, duke sjellë transformime të mëdha për Kosovën.
“Së bashku mund të bëjmë gjëra të mëdha, dhe GENESIS është vetëm fillimi i asaj që mund të arrihet kur investojmë në talentet e së ardhmes,” përfundoi Kurti.
Projekti GENESIS pritet të ketë një ndikim të rëndësishëm në zhvillimin e skenës së pavarur kulturore në Kosovë, duke ofruar një platformë për kreativitet dhe inovacion për të rinjtë, si dhe duke përforcuar lidhjet kulturore mes Kosovës dhe Francës. /Katror.info
Përgatiti:
