Shkrimtarja shqiptare Ledia Xhoga është përfshirë në listën e gjatë të pretendentëve për çmimin prestigjioz “Booker Prize 2025” me novelën “Misinterpretation” (përkth. “Keqinterpretimi”), duke u bërë kështu autorja e dytë shqiptare që hyn në këtë garë ndërkombëtare pas shkrimtarit Ismail Kadare.
E lindur dhe e rritur në Tiranë, aktualisht ajo jeton në Nju-Jork, ku ka ndërtuar një karrierë të spikatur letrare. Novela e saj e parë është vlerësuar më herët me Çmimin e Librit të Qytetit të Nju-Jorkut.
Ngjarjet në libër zhvillohen në Nju-Jorkun e sotëm dhe ndjekin historinë e një përkthyeseje shqiptare, që pranon me hezitim të përkthejë gjatë seancave terapeutike të Alfredit, një i mbijetuar torture nga Kosova. Teksa thellohet në botën e trazuar emocionale të klientit të saj, ajo përballet me plagë të së kaluarës dhe me pasojat e vendimeve të pamatura, që e çojnë drejt një udhëtimi të papritur në Shqipëri dhe në një përballje me veten.
Mundesh me e lexu edhe…
Novela trajton me ndjeshmëri të rrallë temat e traumës, identitetit, përkthimit dhe kufirit mes kujtesës dhe realitetit.
Shqipëria është përfaqësuar më parë në këtë çmim nga Ismail Kadare, i cili e fitoi çmimin “Booker” në vitin e themelimit të tij, në 2005-ën, si dhe është nominuar edhe dy herë të tjera në vitet 2017 dhe 2024.
Lista e ngushtë me 6 finalistët për “Booker Prize 2025” do të shpallet më 23 shtator, ndërsa fituesi do të bëhet publik më 10 nëntor në një ceremoni zyrtare në Londër./RTSH/Katror.info
