Zyra e Rregullatorit për Energji (ZRRE) ka bërë të ditur se ka vijuar procesin e liberalizimit të tregut të energjisë elektrike në Kosovë, në përputhje me nenin 37, paragrafi 2 të Ligjit për Energjinë Elektrike.
Sipas ZRRE-së, ky hap synon zhvillimin e tregut të energjisë, rritjen e konkurrencës dhe përmirësimin e shërbimeve për konsumatorët. Në këtë kuadër, është përcaktuar që kompania KESCO të jetë furnizuesi me të drejtën e shërbimit universal. Ligji parasheh që këtë shërbim mund ta përfitojnë të gjithë konsumatorët familjarë dhe ata jofamiljarë me qarkullim vjetor deri në 10 milionë euro ose me jo më shumë se 50 punonjës.
ZRRE ka udhëzuar KESCO që të identifikojë konsumatorët që plotësojnë kriteret për shërbimin universal, ndërsa ata që nuk kualifikohen do të kalojnë në tregun e lirë nga 1 qershori 2025. Për këtë arsye, konsumatorët jofamiljarë duhet të dorëzojnë dëshmitë pranë KESCO-s për të vërtetuar të drejtën e tyre për furnizim me shërbim universal.
Mundesh me e lexu edhe…
Liberalizimi i tregut ka qenë një proces i nisur nga ZRRE që nga viti 2017, por ishte pezulluar përkohësisht për shkak të pandemisë dhe krizës energjetike. Me stabilizimin e tregut, tashmë ekzistojnë kushtet për të lejuar konsumatorët të përfitojnë nga mundësitë e konkurrencës.
ZRRE do të monitorojë zbatimin e këtij procesi për të mbrojtur interesat e konsumatorëve dhe për të siguruar që të gjitha palët e përfshira të respektojnë normat dhe standardet ligjore. Gjithashtu, qytetarët dhe akterët e tregut do të kenë qasje në informacionin e nevojshëm përmes kanaleve zyrtare të komunikimit të ZRRE dhe KESCO. Për më shumë detaje, ZRRE ka publikuar listën e furnizuesve të licencuar në faqen e saj zyrtare. /Katror.info
Përgatiti:
