Edhe pse i ka dhënë fund karrierës si xhudiste, për sukseset e Majlinda Kelmendit do të flitet gjatë. Rezultatet e saj ishin të jashtëzakonshme dhe vazhdojnë të na bëjnë krenar të gjithve.
Një konfirmim për sukseset e saj ka ardhur sërish nga Federata Ndërkombëtare e Xhudos (IJF), e cila në librin e legjendave të xhudos ‘Judo Legends’, që është paraqitur në formë stripi, shkroi: “Xhudistja e mrekullueshme kosovare mban rekorde të pabesueshme në botën e xhudos…”
“Ajo mban rekordin botëror ‘Guiness’ për më së shumti medalje të arta të fituara në Turin Botëror të IJF-së, prej 7 majit të vitit 2010 deri më 24 tetor të vitit 2019”, vazhdon tutje përshkrimi i IJF-së.
Mundesh me e lexu edhe...
Majlinda në vitin 2009 i arriti sukseset e para si juniore, përkatësisht titullin botëror dhe evropian. Më pas nisi me rezultatet si seniore në vitin 2010, ndërsa serinë e sukseseve kulmore e nisi në vitin 2013 me medaljen e bronztë evropiane. Në të njëjtin vit, ajo fitoi medaljen e parë të artë botërore, dhe më pas sukseset e saj nuk kishin të ndalur.
Më 7 maj 2019, Majlinda fitoi medaljen e artë në Grand Prix të Tunizisë, kurse më 24 tetor 2019 të artën në Grand Slamin e Abu Dabit.
Majlinda ka medalje të artë në Lojërat Olimpike. I ka dy të arta botërore për seniorë. Ka një të artë në Masters e shtatë në garat Grand Slam. I ka edhe plot dhjetë në garat Grand Prix, katër të arta nga Kampionatet Evropiane dhe katër nga garat “Continental Open”.
Ky bilanc i jashtëzakonshëm ia siguron rekordin botëror për medalje me shkëlqim ari në garat më të mëdha të xhudos.
Federata Botërore i ka bërë prezantim më të zgjeruar Majlindës në librin për legjendat e xhudos. Ka shkruar se xhudiste si Nora Gjakova e Distria Krasniqi kanë shkuar gjurmëve të Majlindës. Nora e Distria po ashtu janë kampione olimpike, që është titulli më i lartë i mundshëm në sport.
Është shkruar gjithashtu për shtatoren që u ngre në Pejë në nderim të saj, pensionimin pas lëndimeve dhe punën që tashmë e bën si trajnere në ekipin e Driton Kukës.
Majlinda është paraqitur edhe në ballinën e librit së bashku me xhudistët më të mëdhenj që kanë ekzistuar ndonjëherë. Ky libër është shpërndarë për xhudistët në Botërorin e fundit të mbajtur javë më parë në Tashkent të Uzbekistanit.
IJF-ja ka nderuar shumë herë dhe në forma të ndryshme Majlindën. Nga Federata Botërore janë shprehur vazhdimisht të lumtur që një sportiste si Majlinda e kanë në familjen e xhudos, shkruan Koha. Rekordi i Majlindës figuron edhe në faqen e “Guinnessit”.
Përgatiti:
