Garuesja automobilistike Maltina Jashari është nderuar nga Komuna e Prishtinës me simbolin “Hyjnesha e Prishtinës”, si shenjë vlerësimi për përfaqësimin e saj në arenën ndërkombëtare të automobilizmit. Dhurata simbolike iu dorëzua gjatë një takimi të veçantë me kryetarin e kryeqytetit, Përparim Rama.
Në këtë takim, kryetari Rama citoi një moment nga biseda me Jasharin: “Unë e nderova edhe flamurin edhe mbiemrin tim”, duke theksuar se kjo është një fjali që do ta mbajë mend gjatë gjithë mandatit të tij. Ai shtoi se puna dhe përkushtimi i saj janë dëshmi e qartë e vlerës që sjell angazhimi i të rinjve në sport dhe arsim.
Maltina Jashari është e njohur si femra e parë kosovare që konkurron në garat kombëtare të formulës. Më 12 dhjetor 2024, ajo mori pjesë në Kualifikuesit Botërorë të Formula Woman Nations Cup në Dubai Autodrome, ku regjistroi kohën më të shpejtë të xhiros në sesionin kualifikues me 1 minutë e 14 sekonda.
Mundesh me e lexu edhe…
Përveç karrierës në garat automobilistike, Jashari ndjek studimet për Inxhinieri Arkitekturore në Universitetin e Salford, në Mbretërinë e Bashkuar. Ajo është pjesë e ekipit Salford Racing Team, ku ka hyrë në histori si garuesja e parë femër, dhe është duke u përgatitur për pjesëmarrje në garën iMechE Formula Student që do të zhvillohet në vitin 2025./Katror.info
