Në qoftë se mendon se ti, si person i vetëm nuk mund të bësh asgjë për ruajtjen e planetit e ke gabim. Me një veprim të thjeshtë, si mbjellja e një druri, ti mundesh me i kontribu mjedisit. Druri – ky super hero i heshtur, mund të thithë dioksid karboni në një normë prej 19.5 kilogram në vit dhe njëkohësisht lëshon oksigjen të mjaftueshëm për katër njerëz.
Duke e ditur rëndësinë e drurëve, një javë para shënimit të Ditës së Tokës, një organizatë për mbrojtjen e mjedisit dhe disa vullnetarë mbollën dhjetëra drurë në Parkun e Inovacionit dhe Biznesit (ITP) në Prizren.
“Mbjellja e drurëve mendoj se është simbolikë e festimit të Ditës së Tokës dhe mendoj se është një nga arsyet më të mëdha dhe të lehta për ndërgjegjësimin e qytetarëve për mbrojtjen e mjedisit. Ndoshta dikujt mund t’i duket se një mbjellje e një druri nuk është që luan rol kaq të madh, por nëse fillojmë secili nga pak, secili me nga një dru, mendoj se jemi mjaftueshëm ta arrijmë një vetëdijesim më të madh, të arrijmë ta mbrojmë mjedisin sa më shumë që të mundemi. Kjo ditë (Dita e Tokës) është simbolike dhe është dita më e rëndësishme. Toka është e të gjithëve dhe kemi një përgjegjësi gjithmonë me u kujdes për të,” thotë Andina Vllahiu, menaxhere e projekteve në Balkan Green Foundation (BGF).
Mundesh me e lexu edhe…
BGF mori mbështetjen e GiZ Kosova, ITP-së dhe Ministrisë së Ambientit për mbjelljen e drurëve në parkun që i ka vënë synim vetes të bëhet i tëri i gjelbër, duke zbatuar edhe praktikat tjera miqësore me ambientin.
“Ne kemi vizion të gjelbër dhe ai ka elementë të ndryshëm. Mbjellja e pemëve është vetëm një nga gjërat. Në zonat e gjelbra kemi filluar gjithashtu ruajtjen e ujit nga të reshurat, në mënyrë që uji të mos rrjedhë i gjithë jashtë parkut, por ai mund të depërtojë në tokë dhe të kontribuojë në ekosistemin këtu, në ekosistemin natyror gjithashtu. Gjithashtu po shikojmë sesi i trajtojmë sipërfaqet tona të gjelbra që të mos e presim shpesh barin, sidomos në pranverë kur bimët lulëzojnë dhe është shumë mirë që insektet t’i lënë të rriten pak. Lulet gjithashtu ushqejnë insektet dhe kafshët e tjera që i kemi në park,” thotë Hans Juergen Kassens, udhëheqës i projektit të GIZ/ITP.
Dhjetëra studentë të Fakultetit të Biologjisë kontribuuan në mbjelljen e drurëve, që nuk janë të paktë në këtë park. Andina thotë se Balkan Green Foundation, që nga viti 2014 fokusohet në ruajtjen e mjedisit duke pasur në fokus energjinë e pastër dhe zhvillimin e qëndrueshëm.
“Mendoj që ne me qenë të vetëdijshëm për sa e rëndësishme është si qytetarë mbrojtja e mjedisit qoftë në format më të vogla, mendoj që ajo luan rol shumë. Do të thotë sa më shumë që ne mundohemi si organizata me i ndërgjegjësu e vetëdijesu popullin, atëherë mendoj se mundemi me arrit një pikë të vogël me u ndërgjegjësu publiku,” thotë Vllahiu.
Tema e ditës së tokës këtë vit është “Planeti kundër Plastikës” që bën thirrje për t’i dhënë fund plastikës për hir të shëndetit njerëzor dhe planetar, dhe kërkon një reduktim prej 60% të prodhimit të plastikës deri në vitin 2040. Kosova mund të mos jetë afër largimit të përdorimit të plastikës, por të paktën legjislacionin e ka në një vijë me agjendën e gjelbër. E tëra që duhet është zbatimi.
“Ndryshimet klimatike sot po paraqesin sfidën më të madhe për të ardhmen e njerëzimit dhe sistemet për mbështetjes së jetës që bën planetin të banueshëm. Për të tejkaluar këtë situatë nevojitet të veprohet sa më shpejt që është e mundur në zbatimin e ligjeve, strategjive dhe rregulloreve në fuqi për mbrojtjen e mjedisit, forcimin e institucioneve që merren me mbrojtjen e mjedisit dhe tokës,” thotë Zëvendës Ministri i Ambientit, Jeton Raka.
Ambienti ruhet nëse ne ndërmarrin veprime të vogla çdo ditë dhe jo të presim vetëm në ditë të caktuara, siç është Dita e Tokës, që shënohet çdo vit me 22 prill.
“Nuk është vetëm një ditë në vit, është si simbolikë, por mendoj se duhet të jetë gjatë gjithë vitit. Unë shoh se në këtë ditë shumë gjëra ndodhin, shumë aktivitete brenda një dite, por të nesërmen shpesh harrojmë se për çfarë bëhet fjalë. Është e nevojshme që të vazhdojmë të kemi parasysh, konkretisht këtë vit me temën planeti kundër plastikës. Plastika është bërë një nga problemet më të mëdha mjedisore në tokë, por edhe në oqeane tani dhe mendoj se gjatë gjithë vitit duhet të kujdesemi më mirë për të,” thotë Hans Juergen Kassens.
Në betejën e vazhdueshme kundër degradimit të mjedisit, çdo përpjekje, sado e vogël qoftë, kontribuon në kauzën më të madhe të mbrojtjes të së ardhmes së planetit tonë. Andaj, mbillni pemë, ruajeni ambientin çdo ditë, jo vetëm në Ditën e Tokës./Katror.info
Edicionin #43 të plotë e gjeni KËTU
Përgatiti:
