Morea Kasapolli, talentja e jashtëzakonshme, zuri vendin e parë në botë në kategorinë U12 për vallëzim modern në Kampionatin Botëror të Vallëzimit Modern.
Ky Kampionat Botëror i Vallëzimit Modern, u mbajt në Kielce, Poloni, dhe ekipi i Çekisë, në të cilin bënte pjesë edhe Morea, triumfoi duke lënë pas shtete si Kanadaja dhe SHBA. 12 vjeçarja, Morea Kasapolli me prindër shqiptarë nga Kosova ka lindur në Çeki. Ajo gjithashtu është mbesa e komentatorit të njohur kosovar të sportit, Agim Kasapolli.
Morea në një intervistë për Radio Kosovën, u shpreh e lumtur që e fitoi vendin e parë në kategorinë U12.
“Jam ndjerë shumë e lumtur dhe e emocionuar sepse konkurrenca ishte shumë e madhe, ndërsa ne e fituam çmimin e parë në botë”, u shpreh Kasapolli për Radio Kosovën.
Lloji i vallëzimit me të cilin konkuroi Morea ishte vallëzimi ‘modern’ dhe ‘jazz’.
“Në vallëzimin modern kemi qenë 19 persona, ndërkaq në vallëzimin jazz, kemi qenë 22 persona”, shpjegoi tutje Morea.
Ndërkaq tutje Morea tregoi sfidat dhe vështirësitë që hasi për t’u bërë pjesë e këtij grupi të madh vallëtarësh, si dhe në një garë të tillë.
“Vështirësitë janë të mëdha, sepse konkurrenca ka qenë e madhe, pasi kanë marrë pjesë mbi 30 shtete të botës”, u shpreh Morea.
Rrugëtimi dhe dëshira për vallëzimin për Morean nisi para 3 vitesh, por që vitin e fundit i është përkushtuar shumë më tepër.
“Vallëzimi më pëlqen shumë, dhe me të merrem qe tre vite. Vitin e fundit, kam pasë fatin të pranohem në studion më të mirë të vallëzimit në Çeki, “Dance Company MIRAKL”, u shpreh Morea tutje.
Për fund, Morea u shpreh e lumtur dhe se planifikon ta vazhdojë përkushtimin dhe planet për vallëzimin edhe më tutje, duke shprehur dëshirën për të marrë pjesë edhe në gara më të mëdha ndërkombëtare të vallëzimit./Katror.info
Përgatiti:
