Muzeu Kombëtar i Kosovës do të kalojë në një transformim të rëndësishëm për të ofruar një përvojë më moderne dhe me standarde të reja për dokumentimin dhe prezantimin e historisë së Kosovës. Ky projekt ambicioz synon të përmirësojë cilësinë e ekspozitave dhe kushteve të ruajtjes për fondin muzeor.
Kontrata për restaurimin e përgjithshëm të muzeut është nënshkruar tashmë, dhe Këshilli Drejtues ka vendosur për mbylljen e Muzeut për një periudhë 1 vjeqare. Restaurimi fillimisht do të përqendrohet në konsolidimin e kushteve të deposë, duke siguruar që koleksionet e rëndësishme të ruhen në mënyrë të përshtatshme dhe të sigurt.
Përveç restaurimit, Ministri i Kulturës, Hajrulla Çeku ka njoftuar se po vazhdojnë përpjekjet për trajtimin e fondit muzeor dhe po formohet një komision profesional për të rikonceptuar ekspozitat e përhershme.
Këto hapa janë të nevojshëm për të modernizuar përmbajtjen dhe strukturën e ekspozitave, duke e bërë muzeun një destinacion më tërheqës dhe edukativ për vizitorët.
Muzeu Kombëtar i Kosovës, i cili u themelua në vitin 1949, është një nga institucionet më të rëndësishme për ruajtjen e trashëgimisë kulturore dhe historike të Kosovës. Ai ka një koleksion të pasur që përfshin objekte arkeologjike, artefakte historike dhe arte të ndryshme.
Ristrukturimi dhe modernizimi i muzeut do të kontribuojnë në forcimin e rolit të tij si qendër kryesore për studimin dhe ekspozimin e historisë dhe kulturës së Kosovës./Katror.info
