Arkeologët kanë zbuluar observatorin e parë dhe më të madh astronomik nga shekulli i 6-të para Krishtit – i vendosur në Kafr Sheikh, Egjipt.
Më shumë se 2500 vjet më parë, kjo ndërtesë ishte observatori më i madh astronomik në Egjipt, në shekullin VI para Krishtit, dhe pjesë e asaj që sot njihet si Tempulli i Faraonëve në qytetin e Butos.
Në këtë vend, astronomët e hershëm ndiqnin lëvizjet e diellit dhe yjeve, që ishin thelbësore për jetën e egjiptianëve. Egjiptianët e lashtë ishin ndër astronomët më të aftë të antikitetit dhe ndikimi i tyre është ndjerë edhe sot.
Kalendari 365-ditor dhe ndarja e ditës në 24 orë u zhvilluan në Egjiptin e lashtë. Egjiptianët ishin të aftë të identifikonin yjësitë dhe krijuan zodiakun e tyre, disa shenja të të cilit janë të njohura edhe sot.
Objekti i ndërtuar me tulla mbulon një sipërfaqe prej 850 metra katrorë dhe ka formë në L që mbështetet në shtylla. Hyrja është orientuar nga lindja. Brenda tij u gjetën artefakte të lidhura me studimin e qiellit.
Një nga gjërat më të veçanta ishte një orë e madhe diellore që, përmes hijes së diellit nga agimi në muzg, ndihmonte në përcaktimin e kohës.
Pesë dhoma më të vogla shërbenin për të ruajtur mjetet e observatorit. Katër prej tyre ishin me tulla dhe njëra me gurë, që mund të ketë shërbyer si kullë. U gjet gjithashtu një holl i madh me tre mure të lyera dhe murale.
Artefakte të tjera përfshijnë mjete matëse, statuja, varëse, simbole qeramike, amfora dhe tavolina.
Astronomia kishte një rëndësi të jashtëzakonshme për egjiptianët e lashtë. Ata përdornin kalendarët për të shënuar kohën, për të vendosur datat për ritualet politike dhe religjioze, si festivalet dhe kurorëzimet./Katror.info
