Sot, është Dita Botërore e Turizmit dhe tema e këtij viti është “Turizmi dhe Paqja”, që synon të nxjerrë në pah rolin jetik të këtij sektori në nxitjen e paqes dhe mirëkuptimit mes kombeve e kulturave, si dhe në mbështetjen e proceseve të pajtimit.
“Kombet e Bashkuara shprehen se në nivel global ku kombet janë të ndërlidhura e të ndërvarura, turizmi, një industri e krijuar nga njerëzit dhe për njerëzit, shfaqet si një forcë bindëse e dinamike për të sfiduar stereotipet dhe paragjykimet.”
Ky sektor mund të perceptohet si mishërimi i dialogut ndërkulturor. Ai lejon të takojmë “tjetrin”, të mësojmë për kultura të ndryshme, të dëgjojmë gjuhë të huaja, të shijojmë shije ekzotike, të lidhemi me qeniet e tjera njerëzore dhe të krijojmë tolerancë. Sipas Organizatës së Kombeve të Bashkuara, në thelb, turizmi është një përvojë edukative dhe shpirtërore që zgjeron mendjen.
Mundesh me e lexu edhe…
Studimet kanë treguar se vendet me një sektor turistik më të hapur dhe të qëndrueshëm priren të jenë më paqësore. Turizmi përhap filantropinë dhe çon në bashkëpunim rajonal.
“Për shembull, disa vende afrikane po zbatojnë një politikë të hapur vizash për anëtarët e Bashkimit Afrikan për të inkurajuar lëvizjen e lirë të njerëzve dhe për të nxitur turizmin dhe tregtinë.”
Në Kosovë, do të shënohet në mënyra të ndryshme kjo ditë.
Oda e Hotelerisë dhe Turizmit, do të mbajë sot tryezë diskutimi me temën “Turizmi dhe Paqja”.
“Me qëllim që të theksohet që turizmi është katalizatori kryesor i zhvillimit të një shteti në kuadër të aktiviteteve të shumta do të mbahet edhe tryeza tematike “Turizmi dhe paqja”.
Gjithashtu, edicioni i dytë i Konferencës së Turizmit dhe Mikpritjes (KonTur) në Prizren që organizohet nga OJQ “Educo” do të mbahet në Qendrën Evropa nga data 27 shtator deri më 29 shtator.
Synimi është që ky organizim të shërbejë si një platformë për ekspertët, praktikuesit dhe palët e interesuara për të shkëmbyer njohuri, ide dhe bashkëpunime në mënyra të ndryshme për të përmirësuar industrinë e turizmit.
KonTur, sipas organizatorëve, në këtë edicion do të trajtojë temën “Kon-Tur-bulenca”, e cila lidhet ngushtë dhe në mënyrë direkte me konceptin e turizmit masiv.
“Kjo temë thekson qëllimin e arritjes së ekuilibrit dhe harmonisë mes turmave plot zhurmë; Përcjell idenë e menaxhimit të volumit të lartë të turistëve në një mënyrë që të sigurojë një përvojë pozitive si për vendasit ashtu edhe për vizitorët, duke adresuar njëkohësisht nevojën për rregullim dhe planifikim të menduar”, thuhet në njoftimin e OJQ “Educo”./Katror.info
Përgatiti:
