Punëtorët në Kosovë kanë marshuar për 1 Maj në Prishtinë me kërkesa për përmirësimin e kushteve të punës e ngritjen e pagave. Përfaqësues të punëtorëve thanë se ngritja e çmimeve ua ka rënduar gjendjen ekonomike. Ndërkaq, kërkuan që të punohet drejt ngritjes së pagave bazuar në shtrenjtimin e rrymës e produkteve të tjera.
Me rastin e 1 Majit- Ditës Ndërkombëtare të Punës, Sindikata e Re e KEK-ut, Kolektivi Feminist, Qendra Sociale “Përpjekja” dhe aktivistë të pavarur, në bashkëpunim me sindikata të tjera, organizuan një marsh protestues në Prishtinë.
Protesta është mbajtur për të adresuar kushtet e vështira të punës, inflacionin dhe mungesën e të drejtave të punëtorëve.
Mundesh me e lexu edhe…
Kryetari i Sindikatës së Re të KEK-ut, Nexhat Llumnica, theksoi se protesta është e domosdoshme, për shkak të sfidave të shumta, me të cilat përballen punëtorët e sektorit energjetik.
“Inflacioni i kohëve të fundit që lidhet me çmimin e energjisë elektrike dhe produktet varëse. Punëtorët e KEK-ut punojnë, sfidojnë, rrezikojnë jetë dhe vdesin 1 për qind e stafit si rezultat i sëmundjeve profesionale që ne dyshojmë që marrin gjatë procesit të punës e pasurohet KEDS-i në këtë rast”, ka thënë ai.
Sipas tij, Korporata Energjetike e Kosovës çmimin e energjisë elektrike e shet 29 euro e 50 centë që nga viti 2019, ndërsa për KEDS-in është ngritur katër herë çmimi i energjisë elektrike.
“Si rezultat i kësaj, ne po punojmë, ata po bëhen milionerë. Për këtë arsye, kërkojmë ngritje të pagave, respektim të të drejtave ligjore”, ka deklaruar Llumnica.
E, Anita Nitaj nga Kolektivi Feminist foli për barrën shtesë që gratë mbajnë në shoqëri, duke theksuar pabarazinë gjinore dhe pasigurinë ekonomike, me të cilën ato përballen çdo ditë.
“Gratë në këtë shoqëri punojnë dy herë: një herë në vendin e punës dhe pastaj në shtëpi, ku puna e tyre nuk njihet, nuk paguhet, nuk respektohet. Është një punë e heshtur, që mbahet mbi supet e tyre si një detyrë e natyrshme. Por sa herë që diskutohet ekonomia, gratë as nuk përmenden. Ndërkohë, paga minimale në Kosovë nuk është për të jetuar”, ka theksuar ajo.
Sipas saj, çdo muaj punëtorët përballen me të pamundura.
“Kur ngrenë zërin, u thuhet se duhet të jenë mirënjohës që kanë një punë. Kjo nuk është punë. Ky është shfrytëzim. Në më pak se gjashtë muaj, dhjetë punëtorë kanë humbur jetën në vendin e punës, jo nga një aksident, por nga neglizhenca, mungesa e kushteve dhe përbuzja për jetën e tyre”, ka deklaruar Nitaj.
Federata Sindikale e Punëtorëve Teknikë të Sektorit Privat të Kosovës, në protestën e saj ka kërkuar që paga në sektorin privat të rritet në 600 euro, të ketë marrëveshje kolektive, sigurime shëndetësore dhe të ketë Gjykatë të punës.
Kryetari i saj Jusuf Azemi ka thënë se nëse nuk do të rriten pagat deri me 1 shtator atëherë sektori privat do të bojkotojë punën. Azemi ka theksuar se institucionet shtetërore në vend, punëtorët e sektorit privat i kanë trajtuar si skllevër./RTK/Katror.info
