Në Prishtinë filloi Konferenca Ndërkombëtare për Digjitalizim, që do të zgjasë edhe nesër.
Në kuadër të kësaj konference do të mbahen edhe panele diskutimi, performanca artistike dhe promovime librash.
Kryetari i Prishtinës, Përparim Rama, tha se kryeqyteti po ecën përpara me hapa të shpejtë në aspektin e digjitalizimit, duke theksuar se kanë krijuar infrastrukturën e nevojshme digjitale në gjithë kryeqytetin.
Mundesh me e lexu edhe…
“Kemi krijuar infrastrukturën e nevojshme për platformën ‘Smart City’ apo ‘Qyteti i Mençur’, ku i kemi ndërlidhur pjesë të shumta të kryeqytetit me sensorë, përmes të cilëve monitorojmë aspekte të ndryshme si trafikun, mbeturinat, madje edhe kapakët e pusetave, pasi ka pasur raste të vjedhjes së tyre. Tani ato janë të pajisura me sensorë dhe kur lëvizin, ne e dimë. Kjo krijon një siguri shtesë për qytetarët e kryeqytetit. Po ashtu, kemi edhe sensorë të tjerë që janë të ndërlidhur me klasat në shkollat tona, për të monitoruar cilësinë e ajrit”, tha Rama.
Këto shërbime kryeqyteti i prezanton në Konferencën dyditore për digjitalizim, ku po marrin pjesë ekspertë nga fusha të ndryshme si urbanizmi, arkitektura, politikat mjedisore dhe teknologjia, të cilët ndanë njohuritë dhe përvojat e tyre./EO/Katror.info
