Sherife Lohaj, një grua që merret me bujqësi, nga fshati Mirash, është shembulli i gjallë i një gruaje që nuk është dorëzuar përballë sfidave në bujqësi. Pavarësisht kushteve të vështira klimatike dhe humbjeve të mëparshme të të mbjellave, Sherifja ka arritur të kthejë pasionin dhe përkushtimin e saj në sukses të qëndrueshëm, falë qasjes në teknologji dhe mbështetjes së duhur.
Përmes projektit IWKA “Përfshirja e grave në agrobiznesin e Kosovës”, ajo përfitoi një sistem ngrohjeje për serat e saj, i cili e ndihmon të mbrojë farat dhe fidanët nga temperaturat e ulëta. Kjo teknologji i ka mundësuar të dalë më herët në treg, të ketë prodhime më cilësore dhe të konkurrojë me çmime më të mira.
“Ka pasur sezone kur puna jonë shkonte huq nga i ftohti, por tani jam më e sigurt në atë që kultivoj. Ky sistem më jep siguri dhe rendimente më të larta,” tha Sherifja.
Mundesh me e lexu edhe…
Përfitimet janë të shumëfishta: siguri për të mbjellat, të ardhura të qëndrueshme për familjen, mundësi për investime të reja dhe një pozicion më konkurrues në tregun lokal. Historia e saj është dëshmi se kur gratë kanë qasje në mjete dhe mbështetje të duhur, ato mund të transformojnë jo vetëm jetën e tyre, por edhe komunitetet përreth.
Ky projekt mbështetet nga Ministria Federale Gjermane për Bashkëpunim dhe Zhvillim Ekonomik (BMZ), përmes Engagement Global GgmbH, dhe zbatohet nga CARE International në bashkëpunim me organizatat vendore Kosova–Women 4 Women (K-W4W) dhe CRP/K.
