Ngjarja më e madhe teknologjike në vend, FOSS4G së shpejti në Prizren

Është prej ngjarjeve teknologjike botërore më të mëdha. Ka rrugëtuar në dhjetëra vende e kontinente me një bagazh prej 15 vjetësh. Madje ka arritur që të lë gjurmë në fushën e inovacioneve gjeo-hapësinore.

Konferenca “FOSS4G” kësaj radhe zbarkon në Prizren, duke shënuar edhe ardhjen e parë në Ballkan.

Nga 26 qershori deri më 2 korrik, qyteti i kulturës do shndërrohet në cak teknologjik. 200 ligjërues për 1000 pjesëmarrësit që vijnë nga 120 vende të botës janë krejt çka e presin këtë rrugëtim si shans për Kosovën.

Programi do të jetë i pasur me 80 punëtori, 200 prezantime, ligjërime akademike, sesione, ekspozita nga organizata dhe kompani të ndryshme që kontribuojnë në zhvillimin e teknologjisë gjeohapësinore. Por, ajka kryesore qëndron te pjesa akademike, ku do të mirëpriten shkencëtarët më në zë të teknologjisë gjeohapësinore.

“Në pjesën akademike e cila do të zgjasë nga data 28 deri më 30 qershor do të jenë diku 30 prezantime të lëmive të ndryshme, të zhvillimeve më të fundit të hulumtimit shkencor. Do të ketë shkencëtarë nga e gjithë bota që do të vijnë të prezantojnë punën e tyre që e kanë bërë, ka hulumtime që janë bërë edhe për Kosovën, ka hulumtues e shkencëtarë edhe nga Kosova që do të marrin pjesë në programin akademik në tema të ndryshme si big data, smart cities por në përgjithësi fokusohet te përdorimi i softuerave të hapura me burim dhe kod të hapur të geospatial”, thotë Gresa Neziri nga organizata SpaceSyntaKS.

Në kuadër të programit është edhe pjesa e “Keynotes”, e cila përbëhet nga gjashtë folës dhe trajtohen si ligjëratat më speciale të konferencës. Pesë nga ta janë të huaj, ndërkaq profesori Lorik Haxhiu do ta trajtojë pikërisht një hulumtim i cili do t’iu shërbejë vendorëve.

“Ndër ‘keynote’ kemi edhe një nga Kosova që do të prezantojë punën e tyre që po bëjnë direkt për Kosovën, duke përdorur të dhëna për shputat e shtëpive në Kosovë që do të jetë platformë me burim të hapur që do t’i ndihmojë gjithë komunitetit të Kosovës”, tregon tutje Neziri për Katror Media.

Organizatorët kanë tentuar të gjejnë forma alternative për pjesëmarrësit, duke përfshirë komunitetin e huaj, vullnetarët e studentët. Ndërkaq pjesë të veçantë iu është kushtuar të interesuarve nga Ballkani.

“Na e kemi përdor një politikë sivjet ku ju kemi ofruar disa alternativa. E para në nivel botëror ekziston ‘early bird ticket’ që mundesh me ble tiketën ma lirë para se me dal bileta fikse e konferencës mirëpo e kemi parë që kjo nuk është që na jep favor për t’i sjellë kosovarët duke e ditur gjendjen ekonomike të vendit në të cilin jetojmë na. Për këtë arsye kemi dhënë një biletë tjetër për vendet e Ballkanit, nuk e kemi limituar me Kosovë se ideja e konferencës është të sjellim më shumë komunitet sidomos të rajonit”, thotë organizatori tjetër, i cili është udhëheqësi i konferencës, Besfort Guri.

Lajmi i mirë për ata që duan të jenë pjesëmarrës në “FOSS4G” është se ende ka bileta në shitje.

“Bileta ka sa të dush, s’ka numër të limitum për blerjen e biletavce. Munden me u gjet në webfaqen tone 2023.foss4g.org. është seksioni registration ku mundeni me ble biletën, poashtu edhe akomodimin nëse vini nga një vend apo qytet të caktuar që s’ka linja të autobusit direkte. Po besoj që ka gjithkund, por nëse s’ka munden me pasë edhe pjesën e akomodimit që është brenda ITP”, thekson Guri.

Mbi 50 biznese globale e lokale po mbështetin konferencën, ku krahas kompanive globale si Re:Earth, META, QGIS.JP, OPENGIS, SparkGEO, OpenGeoGroep, GEOCAT, GeoSolutions, mbështetës të konferencës janë edhe ato vendore si Procredit Bank, ITP Prizren, IPKO, GISKOS, Geo&Land, IRN e shumë të tjerë.

FOSS4G mbledh së bashku sektorin e teknologjisë, zhvilluesit, përdoruesit, vendimmarrësit dhe profesionistët nga një spektër i gjerë i organizatave dhe fushave të operimit. Përmes shtatë ditëve të punëtorive, prezantimeve, diskutimeve dhe bashkëpunimit, pjesëmarrësit e FOSS4G krijojnë produkte, standarde dhe protokolle gjeohapësinore efektive që kanë ndikim global.

FOSS4G 2023 është ngjarje vjetore e organizuar nga Fondacioni i Hapur Gjeohapësinor (OSGeo) që nga viti 2006 dhe është një nga takimet më të mëdha globale për softuerin gjeohapësinor të vitit.  FOSS4G 2023 organizohet nga FLOSSK, organizatë kosovare që promovon softuerin e lirë dhe të hapur që nga viti 2009. Vitin e ardhshëm konferenca udhëton për në Brazil.

Katror Media është partneri i vetëm medial vendor që do të ndjekë ngjarjet e “FOSS4G” dhe do t’ua sjell audiencës së vet të gjitha detajet e kësaj aventure teknologjike. /Katror.info