Prishtina u mbush sot me gëzim, kreativitet dhe ngjyra në kuadër të festimeve për 1 qershorin – Ditën Ndërkombëtare të Fëmijëve. Aktivitetet e shumta u zhvilluan në disa prej shesheve kryesore të qytetit, me fëmijët në qendër të vëmendjes, raporton Katror.info.
Qendra e festimeve ishte Sheshi “Zahir Pajaziti”, ku nga ora 11:00 deri në 16:30 u organizua një program i pasur artistik dhe argëtues.
Fëmijët patën mundësinë të shijojnë koncerte, performanca baleti, punëtori arti, lojëra interaktive dhe shfaqje filmash, duke krijuar një atmosferë festive për ta dhe familjet e tyre.
Mundesh me e lexu edhe…
Festimet nisën me një fjalë përshëndetëse nga kryetari i Komunës së Prishtinës, Përparim Rama, i cili theksoi rëndësinë e mbrojtjes dhe mirëqenies së fëmijëve si një nga prioritetet e institucionit që ai drejton.
Kontribut të veçantë në këtë ditë dhanë edhe Orkestra e Fëmijëve “Amadeus”, Qendra Kulturore e Fëmijëve, si dhe Shkolla e Mesme Muzikale “Prek Jakova”, të cilat sollën performanca të bukura artistike për të pranishmit.
Një nga momentet më të veçanta ishte parada simbolike “Ec me Fëmijët”, ku fëmijët marshuan me punimet e tyre artistike në duar, duke përçuar mesazhe për kreativitet, barazi dhe të drejtën për të qenë të dëgjuar.
Në Sheshin “Skënderbeu” u mbajt gjithashtu parada e fëmijëve, e cila u shoqërua me shpërndarje fletushkash edukative nga Policia e Kosovës, duke promovuar sigurinë dhe të drejtat e fëmijëve.
Në sheshet “Skënderbeu” dhe “Nënë Tereza” u mbajtën aktivitete të tjera, duke përfshirë turne futbolli, gara karateje, pingpong dhe basketboll 3×3, që synonin të promovonin jetën aktive dhe frymën e bashkëpunimit.
Kjo ditë e mbushur me ngjyra, muzikë dhe buzëqeshje rikujtoi se fëmijët janë e ardhmja e shoqërisë sonë dhe se detyra e të rriturve është t’u sigurojnë atyre një ambient të sigurt, të dashur dhe plot mundësi për të ëndërruar.
Prishtina jo vetëm festoi sot, por dha edhe një mesazh të fortë: fëmijëria duhet të jetë gjithmonë e mbrojtur, e respektuar dhe e festuar./Katror.info
