Me qëllim që t’u ofrojnë dhe t’u krijohet hapësira e duhur fëmijëve super-talentë të Prishtinës, Qendra Kulturore për Fëmijë (QKF) po zhvillon fushatën nëpërmjet së cilës synohet të mblidhen fonde për krijimin e një vendlokacioni të ngrohtë, rekrativ dhe të përshtatshëm, ku fëmijët nga mosha 10 vjeç e tutje, t’i zhvillojnë aftësitë e tyre dhe të mësojnë më tepër për kinemanë dhe teatrin.
Kjo fushatë, e nisur së fundmi në formatin e fundrasing, synon të krijojë një hapësirë kulturore joformale të Kinemasë dhe Teatrit të Hapur të Prishtinës, ku të rinjtë mbi 10 vjeç mund të zhytën në botën e kinemasë dhe teatrit.
Disa nga aktivitetet që do të ofrohen në kuadër të Kinemasë dhe Teatrit të Hapur të Prishtinës përfshijnë: shfaqjen e filmave dhe dokumentarëve, organizimi i shfaqjeve muzikore dhe teatrale, mikpritjen e ngjarjeve letrare dhe artistike, mbështetjen e artistëve të rinj, organizimin e punëtorive dhe klasave, përmirësimin e aftësive sociale, socializimin e kështu me radhë.
Mundesh me e lexu edhe...
Kjo ide buroi nga nevoja që të rinjët prishtinas, ndonëse me talente të shumta, si në muzikë, art e kulturë, kanë qenë në mungesë të një platforme ku do të mund t’i shprehnin talentet, t’i zhvillojnë aftësitë, si dhe të bashkohen dhe të punojnë në krijimin e projekteve të reja.
“Të rinjtë e Prishtinës kanë talent të madh, por u mungon një hapësirë për ta shprehur atë! Andaj kemi nisur këtë super kampanjë për të mundësuar Kinemanë dhe Teatrin e Hapur për Rininë—një vend ku të rinjtë mbi moshën 10 vjeç mund të eksplorojnë pasionin e tyre për kinemanë dhe teatrin”, thuhet në njoftimin e Kosovoideas në Facebook.
Si mund të kontribuosh edhe ti?
Për të ndihmuar në realizimin e kësaj ideje, ju mund të dhuroni donacione në këtë vegëz.
Donacionet tuaja do t’u ndihmojnë t’i marrin pajisjet teknike të nevojshme dhe ta krijojë një hapësirë komode dhe ftuese për anëtarët tanë. Duke financuar këtë nismë, ju do të kontribuoni në pasurimin kulturor të të rinjve të Prishtinës, duke u ofruar atyre mundësi për të zhvilluar aftësitë e tyre, për të shprehur kreativitetin e tyre dhe për të angazhuar në art dhe kulturë.
Pse është e rëndësishme Kinemaja dhe Teatri i hapur në zhvillimin e aftësive tek fëmijët?
Kinemaja dhe teatri i hapur mund të kenë një ndikim të thellë në zhvillimin e fëmijëve, duke i ndikuar ata në disa fusha kryesore, siç janë zhvillimi kognitiv, aftësitë gjuhësore, zhvillimi emocional e social, emaptia, ndërveprimi social e të tjera.
Kinemaja edhe teatri nxisin imagjinatën e fëmijëve. Ekspozimi ndaj historive, personazheve dhe mjediseve të ndryshme mund të frymëzojë të menduarit krijues dhe aftësitë për zgjidhjen e problemeve. Ndërkaq shikimi i filmave dhe shfaqjeve teatrale i ekspozon fëmijët ndaj fjalorit të ndryshëm dhe strukturave komplekse të fjalive, të cilat mund të përmirësojnë përvetësimin dhe të kuptuarit e tyre gjuhësor.
Një tjetër përfitim është se t’i shohësh personazhet që përjetojnë një sërë emocionesh i ndihmon fëmijët të kuptojnë dhe të lidhen me ndjenjat që mund të mos i kenë hasur drejtpërdrejt. Kjo mund të nxisë ndjeshmërinë dhe inteligjencën emocionale. Përpjekjet dhe rritja e personazheve mund të pasqyrojnë përvojat e vetë fëmijëve, duke i ndihmuar ata të reflektojnë mbi ndjenjat dhe sfidat e tyre.
Kinemaja dhe teatri shpesh shfaqin ndërveprime dhe marrëdhënie të ndryshme sociale, duke u ofruar fëmijëve njohuri mbi normat dhe sjelljet shoqërore. Angazhimi me histori dhe diskutimi i tyre mund të përmirësojë aftësinë e fëmijëve për të artikuluar mendimet e tyre dhe për të kuptuar këndvështrimet e të tjerëve, si dhe për t’i zhvilluar aftësitë komunikative.
Ekspozimi ndaj kulturave, traditave dhe konteksteve të ndryshme historike përmes filmit dhe teatrit zgjeron të kuptuarit e fëmijëve për botën. Analizimi i komploteve, personazheve dhe temave inkurajon të menduarit kritik dhe i ndihmon fëmijët të zhvillojnë aftësitë e tyre analitike. Ndërkaq personazhet dhe veprimet e tyre mund të shërbejnë si model. Sjelljet pozitive dhe strategjitë e zgjidhjes së problemeve të përshkruara në filma dhe teatër mund të ndikojnë në sjelljen dhe vendimmarrjen e vetë fëmijëve.
Pjesëmarrja në projekte të teatrit të komunitetit ose në projekte filmike lokale mund të krijojë një ndjenjë përkatësie dhe përfshirje të komunitetit.
Në përgjithësi, kinemaja dhe teatri i hapur ofrojnë përvoja të pasura dhe të shumëanshme që kontribuojnë në zhvillimin holistik të fëmijëve, duke ofruar përfitime edukative dhe emocionale që mund të formësojnë rritjen e tyre në mënyra kuptimplota.
E këtë synim Qendra Kulturore për Fëmijë (QKF) e Prishtinës ka vendosur ta jetësojë përmes kampanjës për Kinema dhe Teatër të hapur në Prishitnë.
QKF u themelua më 19 nëntor 1961. Vizioni i Qendrës Kulturore për Fëmijë është të krijojë përvoja të ndryshme artistike për të kultivuar dashurinë për artin, duke ndihmuar fëmijët e grupmoshave të reja që ta bëjnë artin, muzikën dhe kërcimin pjesë të jetës së tyre.
Qendra Kulturore për Fëmijë e Prishtinës kryen aktivitetet në ambientet e “Pallatit të Rinisë” përmes një organizimi nga sektorë të ndryshëm si muzika, grupi letrar, grupi i kërcimit, grupi dramatik dhe klubi i ambasadorëve të rinj. Brenda kësaj qendre, fëmijët e moshës 6 deri në 16 vjeç pranohen dhe angazhohen bazuar në vullnetin, aftësitë dhe talentin e tyre./Katror.info
Përgatiti:
