Presidentja e Kosovës, Vjosa Osmani, ka promovuar mbështetjen që Presidenca u kushton fëmijëve me sindromë Down, duke u bërë thirrje edhe institucioneve të tjera që të kontribuojnë në përkrahjen e tyre.
Osmani ka theksuar se, me synimin për të ndërtuar një shoqëri më të barabartë dhe gjithëpërfshirëse, Presidenca ka mbështetur shoqatën ‘Down Syndrome Kosova’ dhe organizata të tjera që punojnë për të drejtat e fëmijëve me nevoja të veçanta.
Sipas saj, me mbështetje dhe mundësi të barabarta, këta fëmijë mund të arrijnë potencialin e tyre dhe të kenë një jetë të plotë dhe të lumtur.
Mundesh me e lexu edhe…
“Ky angazhim nuk mund të realizohet plotësisht pa përpjekjet dhe mbështetjen e të gjithëve. Andaj, ju bëj thirrje edhe institucioneve të tjera që të rrisin këtë mbështetje e njëkohësisht edhe bizneseve, njerëzve të kulturës e artit, mërgatës sonë dhe të gjithë njerëzve vullnetmirë që të kontribuojnë për fëmijët me sindromën Down”, ka shkruar Osmani në Facebook.
Ajo ka njoftuar gjithashtu se ‘Down Syndrome Kosova’ ka publikuar një link në GoFundMe, ku mund të kontribuohet për këtë kauzë.
“Në prag të festës së Bajramit, nuk ka vlerë më të madhe sesa solidariteti me ata që kanë më së shumti nevojë”, ka shtuar Osmani./Katror.info
Përgatiti:
