Presidentja e Kosovës, Vjosa Osmani, ka bërë me dije se kryetari i Vetëvendosjes, Albin Kurti, ka propozuar një takim shtesë para përfundimit të afatit 10-ditor për caktimin e mandatarit të ri, raporton Ekonomia Online.
Osmani tha se pavarësisht kërkesave të disa partive politike për zgjedhje të reja, detyrimi i saj kushtetues është të bëjë çmos për të evituar zgjedhjet e parakohshme. “Kryetari i VV, njëkohësisht kryeministër në detyrë, ka kërkuar të më takojë njëherë para se të skadojë afati 10-ditor. Pas konsultimeve brenda partisë së tij do të vendosë nëse do të vijë apo jo. Ne kemi detyrë kushtetuese që të respektojmë afatet e përcaktuara. Nëse ka propozim për mandatar të ri, hyn në fuqi dispozita të reja kushtetuese dhe afate të reja, por në rast se nuk ka qeveri, afatet për mbajtjen e zgjedhjeve janë të qarta, 30-40 ditë pas skadimit të afatit,” tha Osmani.
Ajo shtoi se situata aktuale është një “fat i keq për Kosovën dhe qytetarët”, duke theksuar vonesat në konsolidimin e institucioneve dhe humbjen e mundësive për vendin. Presidentja theksoi se detyrimi i saj kryesor është respektimi i Kushtetutës dhe aktgjykimeve të Gjykatës Kushtetuese që e obligojnë të bëjë çmos për të shmangur zgjedhjet.
Mundesh me e lexu edhe…
Pas takimit me liderët politikë, Osmani bëri me dije se disa parti nuk kanë shumicën e nevojshme për të propozuar një mandatar të ri, ndërsa të tjerët dëshirojnë të zhvillojnë takime të mëtejshme për të shqyrtuar mundësinë e propozimit të një mandatari të ri. “Diskutuam mbi konsultimet që duhet të ndodhin para caktimit të mandatarit tjetër. Disa përfaqësues politikë nuk kishin shumicë, disa dëshirojnë të takohen sërish. Afati kushtetues prej 10 ditësh skadon më 5 nëntor, dhe deri atëherë do të komunikoj vazhdimisht me partitë për të vendosur nëse do të ketë propozim për mandatarin e dytë,” tha presidentja./EO/Katror.info
