Presidentja e Republikës së Kosovës, Vjosa Osmani, ka pranuar sot një letër nga Presidenti i Shteteve të Bashkuara të Amerikës, Donald J. Trump, në të cilën shprehet mirënjohja për lidershipin e saj të guximshëm dhe përkushtimin ndaj miqësisë mes Kosovës dhe SHBA-ve, shkruan Katror.info.
Në letrën e tij, Presidenti Trump thekson se vendimi i Kosovës për të pranuar shtetas nga vende të tjera tregon gatishmërinë e saj për të bashkëpunuar ngushtë me Shtetet e Bashkuara, duke e cilësuar këtë si një dëshmi të fuqisë dhe dhembshurisë së popullit të Kosovës.
“Shtetet e Bashkuara të Amerikës dhe Kosova ndajnë një lidhje të thellë, të bazuar në respekt të ndërsjellë, vlera të përbashkëta demokratike dhe një vizion të përbashkët për paqe dhe prosperitet,” shkruan Presidenti amerikan, duke nënvizuar angazhimin e Presidentes Osmani për forcimin e kësaj marrëdhënieje.
Mundesh me e lexu edhe…
Presidenti Trump e falënderon Presidenten Osmani për lidershipin dhe e quan atë “një mike e vërtetë e Shteteve të Bashkuara”, duke shprehur gatishmërinë për bashkëpunim të mëtejshëm në vitet në vijim.
Në përmbyllje të letrës, Presidenti Trump përcjell urimet më të mira për Presidenten Osmani edhe nga Zonja e Parë e SHBA-ve, Melania Trump./Katror.info
