Presidentja e Republikës së Kosovës, Vjosa Osmani Sadriu, është nderuar me një nga dekoratat më të larta shtetërore të Antigua dhe Barbudës – “Medalja për Shërbim Besnik dhe Meritor ndaj Atdheut” (Faithful and Meritorious Medal for Service to Country). Kjo medalje i është ndarë Presidentes Osmani nga Guvernatori i Përgjithshëm i këtij shteti, Sir Dr. Rodney Williams, me autorizim të Mbreti Charles III, shkruan Katror.info.
Në njoftimin zyrtar të Presidencës së Kosovës thuhet se medalja iu dorëzua Presidentes Osmani në shenjë mirënjohjeje për lidershipin e saj të guximshëm, kontributin e jashtëzakonshëm për paqen, promovimin e demokracisë dhe fuqizimin e grave në udhëheqje, si dhe për përkushtimin në forcimin e marrëdhënieve ndërkombëtare.
Gjatë darkës zyrtare për liderët e pranishëm në Forumin për Gratë, Paqen dhe Sigurinë, Guvernatori i Përgjithshëm Sir Rodney Williams e vlerësoi Presidenten Osmani si një “shembull frymëzues i udhëheqjes bashkëkohore” dhe një “zë i palëkundur për drejtësinë dhe barazinë në skenën ndërkombëtare”. Ai theksoi se vizioni dhe integriteti i saj kanë tejkaluar kufijtë e Kosovës, duke frymëzuar gra dhe vajza anembanë botës.
Mundesh me e lexu edhe…
Presidentja Osmani, në fjalën e saj, e quajti këtë dekoratë një nder të jashtëzakonshëm për të gjithë qytetarët e Kosovës. “Kjo dekoratë është për popullin tim, i cili ka qëndruar gjithmonë me dinjitet dhe vendosmëri në mbrojtje të lirisë”, theksoi ajo gjatë ceremonisë së pranimit.
Medalja për Shërbim Besnik dhe Meritor ndaj Atdheut përfaqëson një prej çmimeve më prestigjioze të Antigua dhe Barbuda, e rezervuar për personalitete që kanë dhënë një kontribut të veçantë në shërbim të vendit dhe për avancimin e vlerave universale./Katror.info
Përgatiti:
