Presidentja e Republikës së Kosovës, Vjosa Osmani, ka nisur një vizitë zyrtare në Hungari me ftesë të Presidentit hungarez, Tamás Sulyok. Kjo vizitë u hap me një ceremoni të veçantë me nderime ushtarake të mbajtur në sheshin Kossuth Lajos në Budapest, ku Presidentja Osmani u prit nga homologu i saj hungarez, shkruan Katror.info.
Në kuadër të kësaj vizite, të dy presidentët zhvilluan një takim kokë më kokë, i cili u pasua nga takimi i delegacioneve të të dy shteteve, me synim thellimin e bashkëpunimit dypalësh dhe nxitjen e iniciativave të përbashkëta në fusha me interes të ndërsjellë.
Në shenjë respekti dhe mikpritjeje, Presidenti Sulyok shtroi një drekë zyrtare për Presidenten Osmani dhe delegacionin e saj në Pallatin Presidencial Sándor.
Mundesh me e lexu edhe…
Gjatë qëndrimit në Budapest, Presidentja Osmani do të takohet edhe me László Kövér, kryetarin e Parlamentit të Hungarisë, ku pritet të diskutohet për fuqizimin e marrëdhënieve ndërparlamentare dhe mbështetjen për rrugën euroatlantike të Kosovës.
Presidentja Osmani e cilësoi këtë vizitë si të një rëndësie të veçantë për avancimin e marrëdhënieve ndërmjet Kosovës dhe Hungarisë, në funksion të interesave të përbashkëta dhe mirëqenies së qytetarëve të të dyja vendeve./Katror.info
