Pagesat me kartë bankare kanë shënuar një rritje të fortë gjatë vitit 2024, duke arritur nivelet më të larta historike, si në numër transaksionesh, ashtu edhe në vlerë.
Sipas të dhënave të Bankës së Shqipërisë, gjatë vitit të kaluar pagesat me kartë në terminalet POS (pikat elektronike të shitjes) prekën shifrën e 19.6 milionë transaksioneve, me një rritje prej 35% krahasuar me një vit më parë. Krahasuar me vitin 2020, rritja është 237%.
Edhe në vlerë transaksionesh është regjistruar një trend i fortë rritës. Në vitin 2024 pagesat me kartë arritën në 83.3 miliardë lekë, ose 30% më shumë se në vitin 2023 dhe 227% më shumë se në vitin 2020.
Mundesh me e lexu edhe…
Pesha në rritje e kartave
Volumi i pagesave në POS përbënte vitin e kaluar 16% të vlerës totale të veprimeve me karta, nga 14.5% që ishte në vitin 2023.
Një faktor i rëndësishëm ka qenë turizmi ndërkombëtar. Rritja e kërkesës nga turistët për të paguar me kartë ka detyruar gjithnjë e më shumë biznese të ofrojnë këtë shërbim. Në fund të vitit 2024, numri i terminaleve POS arriti shifrën rekord të 24 mijë e 470, me një rritje prej 27.6% brenda vitit dhe gati dyfishim krahasuar me vitin 2020.
Megjithatë, raporti mbetet i ulët në raport me numrin e bizneseve. Shqipëria ka rreth 132 mijë biznese aktive, çka do të thotë se vetëm 18.5% e tyre kanë POS. Për më tepër, pjesa më e madhe është e përqendruar tek rrjetet e mëdha të shitjes me pakicë.
Kartat aktive
Në fund të vitit 2024, sektori bankar raportonte 1.51 milionë karta bankare aktive, me një rritje prej 5.6% krahasuar me vitin paraardhës.
- Kartat e debitit: 1.32 milionë (+6.7%), përbëjnë 88% të totalit.
- Kartat e kreditit: vetëm 113 mijë, me një rënie vjetore prej 5.3%.
Në Shqipëri, ndryshe nga ekonomitë e zhvilluara, karta e kreditit vijon të ketë përdorim të kufizuar, çka lidhet kryesisht me varësinë e lartë të ekonomisë nga pagesat me para fizike./AP/Katror.info
