Dikur parfumet ishin si nënshkrimi ynë personal — një aromë që e mbanim çdo ditë, derisa të bëhej pjesë e identitetit tonë. Sot, rregullat kanë ndryshuar. Në vend të një arome të vetme, është koha e gardërobës së aromave – koleksione të parfumeve që ndërrohen sipas gjendjes shpirtërore, rrobave apo stinës.
Viti i kaluar ishte epoka e aromave të buta, por këtë sezon dominon forca. Sipas #PerfumeTok në TikTok, kërkimet për “aroma intensive” dhe “parfume që zgjasin më shumë” janë rritur me mbi 1000%.
Shembull i përsosur është Trudon Nuit Rouge, me një përqendrim të lartë parfumi prej 20% që kombinon aromën e oudit, shafranit dhe drurit të sandalit. Edhe Escentric Molecules, e njohur për aromat e saj minimalistike, po bëhet më e guximshme me Escentric 02, një përzierje xhami, irisi dhe ambroxani që qëndron gjatë në lëkurë.
Mundesh me e lexu edhe…
Nëse ka një parfum që ka shënuar epokë, ai është Maison Francis Kurkdjian Baccarat Rouge 540 – “Birkin bag”-u i botës së aromave. Tani ai vjen në një version ultra-ekskluziv: Baccarat Rouge 540 Edition Millesime, me vetëm 54 shishe në vit për një dekadë.
Shishja kërkon 500 orë pune dhe është përfunduar me tapon prej ari 24 karatësh, ndërsa aroma përfshin ambergris të rrallë, duke i dhënë thellësi dhe ngrohtësi të re.
Vanilja është rikthyer, por me një prekje moderne. Në vend të aromës klasike të ëmbël, markat po e kombinojnë me nota të papritura. Ellis Brooklyn Vanilla Salt sjell nuanca ujore e freskuese, Donna Karan Cashmere & Vanilla Essence përzien mollë të gjelbër me piper për një kontrast të veçantë, ndërsa Chloe Le Parfum hapet me lule portokalli dhe mbyllet me tonka bean e vanilje të ngrohtë.
Ndërkohë, sprejët po kthehen në një luks të përditshëm. Sipas raportit të Cosmetic Business, tregu evropian i tyre është dyfishuar gjatë vitit të kaluar, falë ndikimit të brezit Gen Z. Por versionet e reja janë shumë më të rafinuara.
Phlur Mrs. Smith është krijuar nga perfumerë që kanë punuar për Byredo, Sam McKnight The Fragrance with Benefits përzien aromë të gjelbër me përbërës që mbrojnë flokët, ndërsa Guerlain L’Art & La Matiere Neroli Outrenoir ofron një kombinim elegant të agrumeve dhe çajit të zi.
Edhe natyra më ekzotike është bërë burim frymëzimi për parfumerët.
Diptyque Lazulio, frymëzuar nga pendët e paunit, përzien rabarbarin me vetiverin haitian, ndërsa Gabar Galone, e frymëzuar nga folklori i Mianmarit, sjell një aromë tymuese me susam, piper sichuan dhe arrëmyshk.
Ashtu si moda mashkullore e sezonit, edhe aromat për meshkuj bazohen në kontraste.
Penhaligon’s The Cut kombinon menten e freskët me pishën e ashpër, Prada Paradigme bashkon geranium të gjelbër me bazë ambery, ndërsa Issey Miyake Le Sel d’Issey sjell një ndjesi deti, druri të djegur dhe vaniljeje — si pas diellit në plazh.
Ndërkohë, pas më shumë se 75 vitesh, Balenciaga rikthehet me dhjetë parfume të reja, përfshirë një version modern të klasikut “Le Dix”.
Ndërkohë, Roxie Nafousi ka lansuar linjën Alia Alter Ego, me tri aroma që përfaqësojnë personalitete të ndryshme: Main Character – e pastër dhe delikate, Power House – e ngrohtë dhe luks, Scene Stealer – e guximshme dhe tokësore. /AP/Katror.info
