Ky sezon i ri futbollistik do të ketë shumë risi sa u përket formateve të kompeticioneve kombëtare të futbollit në Shqipëri. Përveç ndryshimeve në skemën e kampionatit Abissnet Superiore dhe Kategoria e Parë, edhe Kupa e Shqipërisë do të vijë me një tjetër strukturë në edicionin 2023-24 sipas vendimit të marrë nga Komitetit Ekzekutiv i Federatës Shqiptare të Futbollit (FSHF).
Ndryshe nga sezoni i kaluar, duke nisur nga ky edicion në këtë kompeticion do të marrin pjesë 44 skuadra, pra 10 më shumë se sezonin e kaluar, nga kampionatet Abissnet Superiore, Kategorisë e Parë, Kategoria e Dytë dhe ekipi kampion i Kategorisë së Tretë të sezonit 2022-23.
Kupa e Shqipërisë 2023-24 do të jetë e përbërë nga faza para-eliminatore dhe faza eliminatore. Ekipet e renditura nga vendi i parë e deri në vendin e tetë në Abissnet Superiore për sezonin 2022-23 do të garojnë duke filluar nga faza 1/8 (Raundi III-të).
Mundesh me e lexu edhe…
Në turin para-eleminator marrin pjesë ekipet e renditura në vendin e 7, 8, 9 të Kategorisë së Dytë Grupi A të sezonit 2022-23 si dhe vendet e 7, 8, 9, 10 të Kategorisë së Dytë Grupi B të sezonit 2022-2023 si dhe ekipi Kampion i Kategorisë së Tretë sezoni 2022-23. Ndeshjet në këtë tur do të zhvillohen me një takim në fushën e ekipit me renditje më të mirë të sezonit.
Në raundin e parë (1/32) do të marrin pjesë dy ekipet e renditura në vendin e 9-të dhe të 10-të të Abissnet Superiore në Sezonin 2022-23 si dhe 14 ekipet pjesëmarrëse në kampionatin e Kategorisë së Parë në Sezonin 2022-23, 12 ekipet e renditura në gjashtë vendet e para të Kategorisë së Dytë të grupeve A dhe B në sezonin 2022-23, si dhe katër ekipet e kualifikuara nga turi para-eleminator.
Vetëm ndeshjet e turit çerekfinal (1/4) dhe gjysmëfinal (1/2) do të jenë me dy takime.
Formati i ri i Superiores
Sipas skemës së re, kampionati Abissnet Superiore 2023-24 do të ketë katër faza dhe në përfundim të javës së 36-të ekipet e renditura në katër vendet e para do të përballen në një fazë play-off. Kjo fazë do të quhet “Final 4” dhe ekipi fitues do të shpallet skuadra që grumbullon më shumë pikë në këto tre ndeshje.
Të katër ekipet e nisin “Final 4” me 0 pikё, ndërsa ndeshjet do të luhen në stadiumin “Air Albania”.
Në javën e 37 do të ndeshen përkatësisht vendi i parë me të katërtin dhe i dyti me të tretin. Në javën e 38 ndeshen vendi i tretë me të parin dhe i katërti me të dytin. Ndërsa, në javën e 39 dhe të fundit, ndeshen vendi i parë me të dytin dhe i treti me të katërtin.
Rregullat e klasifikimit: Nëse dy ose më shumë ekipe kanë pikë të barabarta në fund të “Final 4”, atëherë renditja e tyre do të bazohet në klasifikimin përfundimtar të 36 javëve të kampionatit Abissnet Superiore.
Ekipi fitues i play-off “Final 4” do të shpallet kampion i Abissnet Superiore dhe do të marrë pjesë në raundin e parë kualifikues të UEFA Champions League, ndërsa dy ekipet e tjera të renditura më mirë do të marrin pjesë në UEFA Conference League.
Në rastet kur ekipi fitues i Kupës së Shqipërisë është i renditur në 3 vendet e para të play-off “Final 4”, e drejta për të marrë pjesë në UEFA Conference League do t’i takojë vendit të 4-t të renditur në play-off “Final 4”.
Sa i përket fundit të renditjes nuk ka ndryshime, teksa vendi i 9-të dhe i 10-të bien automatikisht në Kategorinë e Parë, kurse skuadra e vendit të 8-të do të zhvillojë një finale me fituesin e play-off të Kategorisë së Parë.
Formati i ri i Kategorisë së Parë
Sipas formatit të propozuar dhe më pas të miratuar nga KE i FSHF-së, në këtë edicion të ri do të marrin pjesë 12 skuadra që do të garojnë në tre faza dhe do të luhen në total 33 javë.
Këto 12 skuadra do luajnë me sistem vajtje-ardhje dy fazat e para, ndërsa ndeshjet e fazës së tretë do të zhvillohen sipas një skeme fikse të përcaktuar nga vetë federata dhe të bërë publike tashmë.
Pas përfundimit të tre fazave, skuadrat e renditura në vendin e parë dhe të dytë ngjiten automatikisht në kategorinë Abissnet Superiore.
Skuadrat e renditura në vendin e tretë, katërt, pestë dhe të gjashtë do të luajë ndeshje play-off për të përcaktuar ekipin që do të zhvillojë ndeshje me vendin e tetë të Abissnet Superiore. Përballjet në këtë rast do të jenë vendi i tretë me të gjashtin dhe i katërti me të pestin.
Ndeshjet do të zhvillohen me një takim në stadiumin e skuadrës së renditur më mirë në klasifikimin e përgjithshëm. Në rast barazimi pas 90 minutave të lojës së rregullt, skuadra e renditur më mirë në klasifikim kualifikohet për në ndeshjen finale.
Pas tre fazave skuadrat e renditura në vendin e 11-tё dhe 12-tё zbresin në Kategorinë e Dytë.
Skuadrat e renditura në vendin e 9-të dhe 10-të do të luajnë ndeshje finale play-out me skuadrat fituese të play off të Kategorisë së Dytё Grupi A dhe B./Katror.info
Marrë nga Albanian Post.
Përgatiti:
