Pas rritjes së fortë në vitin 2023, pasuria financiare globale e familjeve pritet të rritet me 6.5 për qind të tjera në vitin 2024, falë lehtësirave monetare, zbuloi të martën siguruesi Allianz.
Lajmi u bë i ditur nga agjencia franceze “AFP”.
“Tendenca aktuale pozitive në tregjet e aksioneve dhe elasticiteti i ekonomive duhet të mbështesin rritjen e aktiveve financiare në vitin 2024”, sipas raportit vjetor të siguruesit, i cili analizon pasurinë globale në gati 60 vende.
Mundesh me e lexu edhe…
Politika monetare kontribuon në këtë dinamikë, pasi bankat kryesore qendrore, përfshirë Bankën Qendrore Evropiane, planifikojnë të ulin më tej normat e interesit përballë rënies së inflacionit dhe frikës së recesionit.
Kjo i jep ekonomisë pak hapësirë frymëmarrjeje dhe është veçanërisht e dobishme për tregjet e aksioneve.
Kështu, “rritja ekonomike këtë vit duhet të jetë e ngjashme me atë të vitit të kaluar, ashtu si edhe përpjekjet për kursime”, me një efekt pozitiv në aktivet financiare, shpjegojnë ekspertët e Allianz-it.
Megjithatë, “turbulencat e verës treguan se çmimet e aksioneve mund të jenë të paqëndrueshme dhe një korrigjim para fundit të vitit është i mundur”, paralajmëron siguruesi.
Në vitin 2023, ekonomitë globale kanë “treguar elasticitet të jashtëzakonshëm pavarësisht nga një shtrëngim i konsiderueshëm i politikës monetare” përballë inflacionit tepër të lartë, nënvizon dokumenti.
Pasuria financiare e familjeve u rrit kështu vitin e kaluar me 7.6 për qind, duke arritur në 239 miliardë euro, që fshiu rënien prej 3.5 për qind të pësuar në vitin 2022 pas fillimit të luftës ruse në Ukrainë, e cila shkaktoi një krizë ekonomike dhe tronditi tregjet.
Rritja u nxit në vitin 2023 nga fitimet në aksione (11 për qind) dhe planet e sigurimit të jetës (6.2 për qind).
Në të kundërt, pasuritë e aseteve të paluajtshme u rritën me vetëm 1.8 për qind, rritja më e dobët në 10 vitet e fundit, për shkak të kostove të ndërtimit dhe normave të larta të interesit që kanë ulur kërkesën për banesa.
Rritja e depozitave bankare gjithashtu u ngadalësua, në 4.6 për qind, pas vitesh kursimesh të detyruara të lidhura me pandeminë COVID-19.
Sipas vendeve, pasuria për frymë – pa borxh – qëndron në rreth 260 mijë euro në Shtetet e Bashkuara, e cila ruan vendin e parë në renditjen ndërkombëtare, përpara Zvicrës dhe Danimarkës.
Franca shfaqet në vendin e 16-të (72 mijë e 380 euro), dy vende përpara Gjermanisë, ku kursimtarët tradicionalisht kanë pak shije për investime të rrezikshme (69 mijë e 60 euro)./Katror.info
Përgatiti:
