Janë emra të shquar artistësh që vijnë me koncerte, të cilët nuk ngjajnë me njëri-tjetrin ashtu si zhanret dhe fryma e muzikës së tyre. “Peja Jazz Festival” hapet me yllin në ngritje, Laura Prince, “Cimbalom Duo” sjell shkrirje të muzikës tradicionale, vokalistja me prejardhje shqiptare, Ceylan Taci, rikthehet edhe në rizbulim rrënjësh e epilogu shpalos ritme nga Japonia, shkuan Koha.net.
“Peja Jazz Festival” në fund të muajit do të rikthehet me edicionin e pestë. Për katër net publiku do të ketë mundësi që të përjetojë përformancat e disa prej emrave me nam në botën e jazzit. Por, sivjet Festivali do të shtrihet përtej Pejës. Do ta “qerasë” kryeqytetin me një koncert. Prej 30 tetorit deri më 2 nëntor në Pejë dhe më 3 nëntor në Prishtinë, “Peja Jazz Festival” do të bashkojë adhuruesit e këtij zhanri muzikor.
Organizatorët, në këtë rast organizata “Anibar”, kanë njoftuar se Laura Prince, vokaliste dhe kompozitore e talentuar me prejardhje nga Togo e Franca, e njohur për stilin e saj autentik dhe emocionet që shpreh në muzikë do të interpretojë në natën e parë.
Mundesh me e lexu edhe…
Në kinemanë “Jusuf Gërvalla” ajo në skenë do të shoqërohet nga pianisti Julian Caetano, që cilësohet yll në ngritje në skenën jazzit.
Nëpërmjet njoftimit është bërë e ditur se “Cimbalom Duo” në përbërje të Káláman Balogh dhe Miklós Lukács sjellin një përzierje të jazzit dhe muzikës popullore nëpërmjet instrumentit të rrallë të cimbalomit. Organizatorët presin që dyshja të ofrojë performancë të pasur në emocione dhe ritme.
Në Kosovë do të kthehet Ceylan Taci, vokaliste me origjinë shqiptare nga Belgjika, e njohur për stilin e saj të veçantë që ndërthur muzikën ballkanike, jazzin dhe ritmet botërore. Ajo do të performojë me grupin “Astrit Stafai & Friends”
E nata e fundit është rezervuar për “Wada Iko Sai”, grup i mirënjohur japonez i përbërë vetëm nga meshkuj që performojnë me daulle tradicionale japoneze. “Me mbi 2.000 performanca në 30 vende të botës, grupi sjell një energji të jashtëzakonshme në skenë, duke promovuar trashëgiminë kulturore japoneze në mënyra bashkëkohore dhe kreative”, bëhet e ditur në komunikatë. Ky grup do të interpretojë më 3 nëntor edhe në teatrin “Oda” në Prishtinë.
“’Peja Jazz Festival 2024’ premton të sjellë një atmosferë unike, duke ftuar adhuruesit e muzikës të shijojnë një përzierje të pasur artistike dhe kulturore nga e gjithë bota”, shkruhet në komunikatë.
Dardan Selimaj, i cili e kuron programin e Festivalit, ka thënë se sivjet mblidhet një përzierje artistësh, të cilët vijnë nga kultura, breza dhe tradita të ndryshme.
“Ky vit, në çdo mbrëmje, sjell artistë që shkrijnë zhanre dhe në performancat e tyre shpërfaqin traditën që përfaqësojnë, duke e aktualizuar atë. Nga Laura Prince, këngëtarja franko-togoleze, muzika e së cilës ndërthur ndikime nga jazzi, ritmet afro dhe soul, e shoqëruar nga mjeshtri francez Julian Caetano, te dyshja ‘Cimbalom Duo’ nga Hungaria, përkatësisht Balogh dhe Lukacs, të dy të dalë nga dinasti muzikantësh romë, të cilët përmes virtuozitetit të tyre bëjnë bashkë traditën dhe inovacionin”, ka thënë ai. Sipas Selimajt – njëherësh ushtrues i detyrës së drejtorit të Filharmonisë së Kosovës – në këtë ngjarje sivjet vjen edhe fryma e etnosit shqiptar që e sjell Ceylan Taci.
“Derisa epilogu është ritmi preciz që përfaqëson grupi japonez “Wadaiko SAI’ përmes lojës në instrumente japoneze me të goditur ose ‘Wadaiko’”, ka thënë ai.
Biografitë e artistëve pjesëmarrës tregojnë për kreativitet që ata e kanë shkrirë në vende të ndryshme të botës.
Laura Prince është autore, kompozitore dhe interpretuese që përfaqëson autenticitetin dhe sinqeritetin përderisa Muzika e saj trajton frikët e fëmijërisë, rrënjët e përziera dhe zemërthyerjet.
“Në moshën 13-vjeçare ajo filloi të lexonte notat dhe të kompozonte pjesët e saj të para, duke u frymëzuar nga epoka e të drejtave civile dhe artistët si Nina Simone, Dinah Washington dhe Ray Charles. Ajo studio etnomuzikologji në Universitetin e Parisit”, shkruhet në biografinë e saj. Në vitin 2019 ajo publikoi albumin “Peace au mine”, që reflekton paqen e saj të brendshme, duke e lidhur atë me tingujt e Afrikës dhe Navarës.
Julian Caetanom, sipas biografisë, filloi të luante piano që në moshën 5-vjeçare. Pas një trajnimi në muzikën klasike, përfshirë mësime me pianisten e njohur rumune Dana Cioccarlie, ai zhvilloi një pasion për jazzin.
Kurse Kálmán Balogh dhe Miklós Lukács u bashkuan në vitin 2009 për të promovuar një instrument me potencial të madh, cimbalomin. “Bashkëpunimi i tyre ka sjellë një frymë të re, ku jazzi takohet me muzikën popullore. Dyshja nisi të eksperimentonte me stilin dhe teknikat e instrumentit, duke krijuar një atmosferë shumë argëtuese. Albumi i tyre i vitit 2015 shënon një moment të rëndësishëm, duke u frymëzuar nga traditat popullore”, shkruhet në biografi. Instrumenti i rrallë ishte krijuar nga Josef Schunda në 1874 dhe ai po ringjallet falë grupit “Cimbalomduó”.
E Ceylan Taci është kompozitore dhe këngëtare e rritur në Bruksel, por me prindër shqiptarë me prejardhje nga Maqedonia.
“Ajo vazhdimisht është në kërkim të ritmeve afrikane, jazz-in dhe muzikës botërore, duke bashkëpunuar me muzikantë të njohur në Belgjikë. Projekti i saj më i fundit ‘Zëri i rrënjëve’ është një koncert narrativ që shpreh temat e frikës, tabuve që lidhen me vetëdijesimin e grave, duke krijuar lidhje mes të kaluarës dhe të tashmes”, shkruhet në biografinë e saj.
Kurse nën moton “Argëtimi rezonon!” grupi japonez “Wada Iko Sai” ka performuar në mbi dy mijë ngjarje në 30 vende dhe janë angazhuar në organizimin e ngjarjeve japoneze dhe bashkëpunime me artistë të zhanreve të ndryshme.
“Prej vitit 2012, ata kanë mbajtur turne të suksesshme në Japoni dhe jashtë saj, përfshirë performancën e parë solo në Forumin Ndërkombëtar të Tokios në 2019. Grupi ka marrë pjesë në ngjarje të rëndësishme kulturore duke përfshirë Kupën e Botës në Rugby më 2019, ku performuan muzikën e hyrjes për ndeshjet kryesore”, shkruhet në biografinë e tyre.
“Peja Jazz Festival” është një organizim relativisht i ri që për të pestin vit me radhë dërgon në qytetin perëndimor tingujt jazzi nga artistë vendorë e ndërkombëtarë./Katror.info
Marrë nga Koha.net me autor Shaban Maxharraj.
Përgatiti:
