Çmimi Michelle Obama do t’i nderojë nxënësit që shkruajnë libra të kujtimeve.
Shtëpia botuese “Penguin Random House” njoftoi se do të emërtonte njërin nga çmimet më prestigjioze në nder të ish-zonjës së parë, Michelle Obama.
Çmimi Michelle Obama për Memoir do të jetë pjesë e programit të Agjencisë Botuese Creative Writing Awards. Në një deklaratë, Penguin tha se çmimi do t’i ofrojë një nxënësi apo nxënëseje të talentuar të shkollës së mesme një bursë prej 10,000 dollarësh për krijimin e një “shkrimi origjinal letrar në gjuhën angleze, në kategorinë e kujtimeve personale apo eseve personale”.
Çmimet për Shkrime Kreative të Penguin jepen në pesë kategori të ndryshme të shkrimit dhe çmimi Obama tani do të radhitet së bashku me çmimet e emëruara për Amanda Gorman dhe Maya Angelou. Ky programi, deri më tani, ka dhënë më shumë se 2.8 milionë dollarë bursash për shkrimtarët kreativ.
E njohur për promovimin e një sërë kauzash gjatë kohës së saj në Shtëpinë e Bardhë, Obama është bërë vetë shkrimtare tejet e frytshme, që kur burri i saj përfundoi detyrën. Kujtimet e saj, në memoir-in “Becoming” u publikuan në vitin 2018, ku përshkruanin rininë dhe edukimin e saj në Chicago, gjatë kohës së saj si Zonja e Parë, shkruan The Week.
Libri pati popullaritet të jashtëzakonshëm, duke kryesuar në listat e librave më të shiturve në të gjithë botën dhe duke shitur më shumë se 17 milionë kopje, ndërsa sipas The Associated Press deri më tani “është libri më i popullarizuar i shkruar nga një banor modern i Shtëpisë së Bardhë”.
“Pas publikimit të librit tim ‘Becoming’, mësova se ta shkruash historisë tënde mund të jetë mjet i fuqishëm”. tha Obama në një deklaratë për Penguin. “Kjo është arsyeja pse jam tejet e emocionuar për këtë çmim të ri dhe mezi pres ta lexoj se çka do të prodhojë për ne kjo gjeneratë e ardhshme e shkrimtarëve të rinj”./Katror.info