Tetori Rozë tashmë është bëre simbol për ngritjen e vetëdijesimit kundër kancerit të gjirit. Ka disa vite që një mori aktivitetesh mbahen përgjatë këtij muaji duke u dhënë shpresë për të ecur përpara të prekurave me kancer dhe atyre që e kanë sfiduar sëmundjen.
Klubi i Ping Pongut Priping në bashkëpunim me Qendrën Kosovare për Luftimin e Kancerit të Gjirit “Jeta Vita” organizoi këtë fundjavë turneun tradicional, “PINK-PONG Breast Cancer Awareness Table Tennis Tournament” për personat e prekur nga kjo sëmundje.
Lumnie Citaku është e mbijetuar e kancerit të gjirit dhe ajo mendon se aktivitete të tilla sportive, janë shumë të rëndësishme për rritjen e vetëdijesimit për luftimin e kësaj sëmundjeje.
Mundesh me e lexu edhe…
“Sigurisht që më jep ndjesi të mirë, sepse dita ditës po vetëdijesohen të gjitha gratë që të bëjnë kontrolle më të shpeshta, të ketë diagnostifikim më herët, si dhe sigurisht që të ketë parandalim për këtë sëmundje, e cila është një sëmundje tinëzare dhe një sëmundje mjaft e rëndë. Vetëm unë dhe të gjitha gratë e tjera që e kanë kalu këtë sfidë e dijmë sa është e vështirë,” thotë Lumnije Çitaku.
Qendra Kosovare për Luftimin e Kancerit të Gjirit “Jeta Vita”, ka punuar pa pushim për 18 vjet për informimin dhe ndërgjegjësimin e popullatës për sëmundjen e kancerit, parandalimin dhe diagnostifikimin e hershëm të saj. Dhe kjo duket se po jep rezultat. Drejtori i Onkologjisë Ilir Kyrtishi theksoi përparimin e dukshëm në zbulimin e hershëm në 3-4 vitet e fundit falë aktiviteteve sikurse që është Tetori Rozë.
“Ka indikatorë që kjo sëmundje 3-4 viteve të fundit po zbulohet herët falë këtyre aktiviteteve dhe falë këtij përkushtimit që bëhet nga njerëzit të vullnetit të mirë, nga njerëzit profesional që merren me këtë sëmundje duke shpërnda informata dhe duhet të jetë një shtytje edhe më e madhe nga Qeveria që programet nacionale të jenë domosdoshmëri, sidomos për kancerin e gjirit, qafës së mitrës dhe zorrës së trashë,” tha Kurtishi.
Ai bëri thirrje qytetarëve e në veçanti grave që të tejkalojnë hezitimin, stigmën, paragjykimin dhe të inkurajojnë njëra-tjetrën që të kryejnë ekzaminime të rregullta të gjirit të paktën një herë në vit.
Ndërsa drejtori i Departamentit të Shëndetësisë në Komunën e Prishtinës, Izet Sadiku, thekson rëndësinë e të qenit aktiv.
“Në fushatën që kemi pasur sivjet për kancerin e gjirit, kemi inkuadruar edhe shumë aktivitete sportive sikurse janë basketbolli, futbolli, volejbolli e pingpongu, të gjitha. Qëllimi jonë ka qenë që ta prekim çdo pore të jetës me qëllim që fansat e këtyre kategorive dhe këto kategori kanë ma shumë ndikim te fansat e tyre sesa vet ne mjekët dhe punëtorët shëndetësorë. Unë besoj se angazhimi i shumë strukturave të ndryshme dhe shumë aktiviteteve e fushave në këtë fushatë, e bënë ma kolorite fushatën dhe ma dobiprurëse, ” Izet Sadiku.
Në gusht të këtij viti në Prishtinë janë realizuar 80 mamografi, ndërkaq në tetor janë realizuar 785 mamografi brenda 20 ditësh. Sipas Sadikut, kur bëhen fushata të mira dhe gjithëpërfshirëse, rezultatet janë të prekshme.
“Sot, arma kryesore që e kemi kundër kancerit të gjirit është zbulimi i hershëm…. Kur e bën fushatën me kauzë të qëlluar – të bashkohen njerëzit,” tha Sadiku.
Ai po ashtu shprehu falënderimin edhe ndaj mediave për punën dhe kontributin që kanë dhënë viteve të fundit në promovimin e këtyre aktiviteteve dhe ndërgjegjësimin e qytetarëve, duke u shprehur se përgjatë muajit rozë mediumet kanë dhënë më të mirën për të kontribuar në këtë kauzë.
Mirënjohje për mediat shpreh edhe Nafije Latifi, themeluese e organizatës “Jeta Vita”.
” Gjatë gjithë këtyre viteve është bërë shumë punë në ndërgjegjësimin e popullatës. Në këtë drejtim na kanë ndihmuar shumë mediat, sepse, ne nëse nuk kemi mundur të shkojmë te çdo familje, mesazhi ynë është përcjellë nga mediat… Është mbërrijtur sensibilizimi i popullatës, por edhe sensibilizimi i institucioneve që këtij problem t’i kushtohet kujdes shumë më i madh.” – Nafije Latifi –
Zonja Latifi shpjegon se nga këto fushata dhe avokimet e përvitshme është krijuar reparti i onkologjisë, janë ngritur kapacitetet e shërbyesve shëndetësorë dhe janë rritur mundësitë dhe qasja për ekzaminimet përmes mamografisë. E këtë e kanë mundësuar sipas saj aktivitetet e ndryshme, përfshirë këtu edhe evenimentet sportive sikurse PinkPong-u.
Bashkëorganizator i këtij turneu për pesë vite me radhë është edhe Rotary Club Prishtina Newborn. Arjeta Pajaziti-Qerimi, anëtare e këtij klubi shpjegon më shumë.
” Ideja kur është shpalos në klubin tonë ka gjetur përnjëherë përkrahje. Kështu që iu kemi bashkuar (aktivitetit) dhe ky është aktivitet i rregullt të cilin e bëjmë. PinkPongu është ajo që ne e shënojmë muajin e vetëdijesimit ndaj kancerit.” – Arjeta Pajaziti-Qerimi –
Aktivitetet në muajin tetor, të njohur në tërë botën si tetori rozë mbahen për të nxitur ndërgjegjësimin për kancerin e gjirit. Kur, qytetarët i bashkohen fushatës, ata bëhen një zë i të prekurave dhe atyre që i kanë mbijetuar, duke iu dhënë forcë për të vazhduar pëprara.
Edicionin #28 të plotë e gjeni KËTU 🙂
Përgatiti:
