Të enjten në Londër është nënshkruar marrëveshja për kredi prej 10 milionë eurove mes Komunës së Prishtinës dhe Bankës Evropiane për Rindërtim dhe Zhvillim (BERZH), shumë që do t’i jepet Trafikut Urban për blerje të 30 autobusëve.
Nga 30 autobusë, gjashtë do të jenë elektrikë me bateri e 24 do të jenë të modelit “Euro VI”, thuhet nga Komuna e Prishtinës. Po ashtu do të ndërtohet edhe infrastruktura për karikimin e tyre.
“30 autobusë të rinj në kryeqytet, gjashtë prej tyre autobusë elektrikë. Sot nënshkruam Marrëveshjen për Kredi prej 10 milionë eurosh me BERZh, në selinë e tyre në Londër, për blerjen e 6 autobusëve elektrik dhe 24 autobusëve efiçient të modelit EURO-VI . Inkorporimi i autobusëve të parë elektrik në qytet dhe në vend është një moment kyç drejt tranzicionit të gjelbër,” ka shkruar kryetari i Prishtinës Përparim Rama në facebook.
Sipas tij, kjo do të ketë një ndikim të prekshëm në jetën e qytetarëveë dhe “do të ndërmarrë hapa kuptimplotë drejt një Prishtine më të shëndetshme dhe më të pastër.”/Katror.info