FC Prishtina dhe FC Ballkani do të zhvillojnë sonte ndeshjet vendimtare për kualifikim në raundin e tretë të Ligës së Konferencës.
Fituesja e Kupës së Kosovës, FC Prishtina, përballet sonte nga ora 20:00 në stadiumin “Fadil Vokrri” me ekipin Larne nga Irlanda e Veriut, në kuadër të ndeshjes së kthimit të raundit të dytë kualifikues. Ndeshja e parë në “Ballymena Showgrounds” ishte mbyllur pa gola. Për Prishtinën, kjo është një mundësi e artë për të qëndruar në garat evropiane, pasi u eliminua në raundin e parë të Ligës së Evropës dhe u transferua në garën e tretë të UEFA-s për nga niveli. Trajneri i skuadrës, Arsim Thaqi, në konferencën për shtyp ka theksuar se synimi është i qartë: fitorja brenda 90 minutave.
“Për ne është shumë me rëndësi që ta përfundojmë ndeshjen brenda kohës së rregullt. Kundërshtari ka përvojë dhe disiplinë në mbrojtje, por ne jemi të përgatitur për çdo skenar”, ka deklaruar Thaqi, i cili pret përkrahje të madhe nga tifozët.
Mundesh me e lexu edhe…
Edhe futbollisti Ardian Muja ka kërkuar mbështetjen e publikut, ndërsa ka theksuar besimin në grupin e lojtarëve dhe përshtatjen e mirë të përforcimeve të reja.
Nëse kualifikohet, Prishtina do të përballet në raundin tjetër me fituesin e përballjes mes Varazhdinit të Kroacisë dhe Santa Clarës nga Portugalia.
Në anën tjetër, nënkampioni i Kosovës, FC Ballkani, do të kërkojë sonte të vulosë kualifikimin në përballje me ekipin maltez, Floriana. Ndeshja nis nga ora 20:45 në qytetin Paola të Maltës.
Portokallezinjtë vijnë në këtë ndeshje me epërsi 4:2 nga ndeshja e parë në “Fadil Vokrri”. Trajneri Orges Shehi ka bërë thirrje për përqendrim maksimal, duke paralajmëruar se pavarësisht rezultatit të favorshëm, nuk do të ketë hapësirë për vetëkënaqësi.
E krahas Prishtinës dhe Ballkanit, të enjten në mbrëmje do të jenë aktive edhe disa klube të tjera shqiptare: Deçiqi i Tuzit, Dinamo e Tiranës (kundër Atletic Escaldes 2:1), Vllaznia e Shkodrës (kundër Vikingur Reykjavik 2:1) dhe Egnatia e Rrogozhinës (kundër Dinamo Minsk 2:0), që gjithashtu luajnë ndeshjet e kthimit në raundin e dytë kualifikues të Ligës së Konferencës./RTK./Katror.info
