Kryeqyteti po vazhdon të transformohet në një qendër të gjallë të jetës kulturore dhe pjesëmarrjes qytetare. Kryetari Përparim Rama ka njoftuar nënshkrimin e një Memorandumi Mirëkuptimi me kolektivin PART – Punëtorët në Art, për menaxhimin e përkohshëm të ish-Bibliotekës “Hivzi Sylejmani”, e njohur ndryshe si CNP.
Kjo marrëveshje ka për qëllim ta rikthejë këtë hapësirë të rëndësishme publike në shërbim të artit, kulturës dhe nismave të komunitetit. Sipas marrëveshjes, PART do të angazhohet për ta bërë hapësirën të qasshme për artistë e qytetarë, ndërsa një Komision i përbashkët do të shqyrtojë kërkesat për përdorim në mënyrë të drejtë dhe të barabartë.
“Ne jemi këtu për ta lehtësuar çdo iniciativë tuajën dhe për t’ju mbështetur në realizimin e ëndrrave që e bëjnë Prishtinën më të gjallë, më kreative dhe më të hapur”, ka deklaruar Rama.
Mundesh me e lexu edhe…
Përveç ish-bibliotekës “Hivzi Sylejmani”, Kryeqyteti po vë në dispozicion edhe hapësira të tjera për komunitetin, si:
- Tuneli i Kurrizit,
- Bunkerat e transformuar në Qendra të Artit në Ulpianë,
- dhe Qendra e re kulturore në Kodrën e Trimave, e cila aktualisht është në ndërtim.
Këto nisma shënojnë një hap të rëndësishëm drejt kthimit të hapësirave publike në vendtakime të ideve, krijimtarisë dhe fuqizimit të komunitetit qytetar në Prishtinë./Katror.info
