Te skuadra e Prishtinës kanë thënë të enjten se dëshirojnë të mbesin edhe më tej pjesë e kualifikimeve të kupave evropiane. Dhe për ta realizuar këtë, Prishtina duhet të fitojë ndaj Larnes të enjten mbrëma në stadiumin “Fadil Vokrri” në Prishtinë. Ndeshja që do të transmetohet direkt në Kohavision, nga ora 20:00, është dueli kthyes i rrethit të dytë kualifikues të Ligës së Konferencës.
Ballafaqimi i parë i zhvilluar në stadiumin “Ballymena Showgrounds” në Irlandën e Veriut u mbyll pa gola.
Prishtina u eliminua nga rrethi i parë kualifikues i Ligës së Evropës, por u bart në kualifikimet e nivelit të tretë të garave të UEFA-s.
Mundesh me e lexu edhe…
Trajneri Arsim Thaqi tha në konferencën për shtyp një ditë para ndeshjes se skuadra e tij është e përgatitur për çdo skenar për duelin ndaj Larnes. Por kualifikimin, tekniku malishevas e synon brenda 90 minutave.
“Për ne, në çfarëdo rrethane është e rëndësishme që ta fitojmë ndeshjen. Ky ekip që kemi përballë, Larne, është ekip me shumë durim, sidomos në fazën e mbrojtjes, vendoset shumë mirë. Edhe me Ballkanin kanë fituar pas vazhdimeve. Besoj se do të tentojnë ta bëjnë të njëjtën gjë edhe këtë vit. Për ne është shumë me rëndësi ta përfundojmë ndeshjen brenda 90 minutave, pasi pas një jave na pret ndeshje tjetër nëse e kalojmë këtë raund”, ka deklaruar tekniku Thaqi.
Ai pret edhe përkrahje të madhe të shikuesve për këtë duel, ndërsa ka folur edhe për gjendjen e futbollistëve.
“Kjo tani është e hapur si ndeshje dhe shpresojmë shumë që nesër lojtarët ta bëjnë maksimumin dhe besoj në atë aspekt. Gjatë këtyre 2-3 ditëve sa kemi stërvitur, motivi i lojtarëve ka qenë shumë i madh. Pres paraqitje shumë të mirë, pres edhe që të vijnë më tepër tifozë”, u shpreh tekniku 54-vjeçar i Prishtinës, që në edicionin e kaluar e fitoi Kupën e Kosovës.
Përkrahjen e shikuesve e ka kërkuar edhe futbollisti i krahut, Ardian Muja.
“Realisht, kanë qenë dy ndeshje mjaft të vështira për ne. Por, besoj që u jemi qasur me seriozitetin më të madh dhe e kemi dhënë më të mirën në fushë. Rezultati në ndeshjen e parë që e kemi luajtur ndaj Sheriffit nuk ka qenë real, për shkak se jemi dënuar me disa gabime individuale. Mirëpo, besoj që gjatë ndeshjeve të tjera kemi filluar të bëjmë përvojë në garat evropiane. Shpresojmë dhe besojmë te grupi që do ta kalojmë këtë raund”, deklaroi 27-vjeçari Muja.
Muja ka luajtur në disa pozita në tri ndeshjet e para të edicionit të ri, por thotë se ndihet mirë dhe e jep maksimumin kudo që ia kërkon trajneri.
“Normalisht ka qenë kërkesë e trajnerit që të paraqitem në ato pozicione. Përderisa e kam besimin e trajnerit dhe bashkëlojtarëve, normalisht se do ta jap më të mirën në fushë, në çfarëdo pozicioni. Ardhjet e reja janë mjaft potenciale dhe kualitative. Janë përshtatur mjaft mirë në grup dhe kemi grup solid që të vazhdojmë edhe në raundet e tjera të paraqitemi sa më mirë”, theksoi Muja.
Të enjten konferencë e stërvitje kanë mbajtur edhe te skuadra e Larnes.
Në konferencë u paraqit vetëm trajneri i skuadrës irlandeze, Nathan Rooney.
Trajneri 35-vjeçar e ka vlerësuar Prishtinën dhe ka treguar se çfarë mund ta vendosë këtë ballafaqim.
“Mendoj se mentaliteti do të jetë faktori vendimtar në këtë ndeshje. Raundet e para kualifikuese i kemi parë gjithmonë se janë shumë të forta. Skuadrat që vuajnë më shumë janë më të qëndrueshme. Kanë më shumë mundësi. Shpresoj që ta shfrytëzojmë këtë marrë parasysh eksperiencën që e kemi në të kaluarën”, deklaroi Rooney.
Trajneri Rooney theksoi se Larne është gati për penallti edhe të enjten ndaj Prishtinës.
“Jemi gjithmonë të përgatitur për penallti. Gjithmonë kërkojmë për më të mirën dhe mendoj se në këtë nivel garash duhet të përgatitesh për çdo situatë”, deklaroi Rooney, shkruan Koha.net.
Skuadra që avancon tutje do të përballet me fituesin e ballafaqimit Varazhdin – Santa Clara.
Në rrethin e dytë kualifikues paraqitet edhe Ballkani. Ballkani nga ora 20:45 luan në udhëtim te Floriana e Maltës. Suharekasit e fituan ndeshjen e parë 4:2.
Drita ndërkohë do të luajë përballë FCSB-së rumune në rrethin e tretë kualifikues të Ligës së Evropës./Katror.info
