Festivali Ndërkombëtar i Teatrit në Prizren i ka bërë një rekapitullim edicionit të sivjetmë duke theksuar se është dëshmuar si ngjarje e rëndësishme në rajon e dëshmi për këtë e ka edhe mbrëmjen finale me shfaqjen “Oranges and Stones”, të realizuar nga “Ashtar Theatre” nga Ramallah të Palestinës. Bëhet fjalë për një shfaqje pa tekst, e ndërtuar përmes veprimit fizik dhe muzikës origjinale, e cila solli një rrëfim të fuqishëm për pushtimin dhe shpërnguljen, që sipas organizatorëve është një metaforë e gjallë dhe prekëse e realitetit palestinez.
“Pas kësaj, në bashkëpunim me aktorë të njohur nga Kosova dhe Shqipëria, u interpretuan ‘The Gaza Monologues’, zëri i të rinjve dhe të rejave nga Gaza. Këto rrëfime autentike, të mbushura me dhimbje, humbje, por edhe forcë shpirtërore dhe shpresë, sollën në skenë dëshminë e një populli që jetojnë në kushte jonjerëzore, por që vazhdojnë të ëndërrojnë për një jetë normale dhe të lirë”, kanë bërë të ditur organizatorët. Sipas tyre, mbrëmja e së hënës nuk ishte vetëm një ngjarje kulturore, por një akt i vetëdijshëm qëndrese dhe solidariteti.
“’Prizren Fest 2025’ përmbylli edicionin e tij me një mesazh të qartë: arti nuk mund dhe nuk duhet të jetë neutral përballë padrejtësisë. Në kohën kur shumë heshtin, artistët kanë përgjegjësinë të flasin. Këtë qëndrim e përfaqësuan fuqishëm edhe përzgjedhja e programit dhe bashkëpunimet ndërkombëtare të këtij edicioni”, shkruhet në komunikatë.
Mundesh me e lexu edhe…
Aty bëhet e ditur se duke vendosur në qendër të vëmendjes zërin e fëmijëve palestinezë dhe duke ndërtuar ura bashkëpunimi përtej kufijve, “Prizren Fest” dëshmoi se festivali nuk është strehë për arratisje, por një platformë për transformim shoqëror përmes artit.
Sipas organizatorëve, “Prizren Fest 2025” u konfirmua si një nga ngjarjet më të rëndësishme kulturore në rajon, jo vetëm për cilësinë artistike, por edhe për angazhimin e tij të palëkundur në mbrojtje të vlerave humane. “Sepse arti nuk është vetëm pasqyrë e realitetit, ai është mjet për ta sfiduar dhe ndryshuar atë”, shkruhet në komunikatë.
Ky edicion është hapur me fragmente nga shfaqja e baletit “Muzg”, me koreografi të Eno Peçit. Lëvizjeve që u ka dhënë formë koreografi e balerini i shquar ndërkombëtarisht, e të luajtura nga trupa e baletit të Teatrit të Operës dhe Baletit në Tiranë kanë gjurmuar për identitet e kujtime. Jo pak i janë përshtatur festivalit në edicionin e katërt që vjen me homazhe e mesazhe paqeje.
“Teatri mbi lumë” është hapësira ku ka nisur rrugëtimin festivali sivjet. Dhe aty janë mbajtur shumica e ngjarjeve. Ndryshe prej edicioneve të kaluara, ku rrëfimet e shfaqjeve shtroheshin në bahçen e kinemasë “Lumbardhi”, kësaj here aty po bëhen renovime dhe hapësira alternative është tejet atraktive.
Në atë hapësirë, që njihet edhe si “Kino Lumi”, ngjashëm sikur ndodhte me shfaqjen e filmave në festivalin ndërkombëtar të filmave dokumentarë dhe të shkurtër “DokuFest” – që nis këtë javë – ata të teatrit në kuadër të “PrizrenFestit” kanë ardhur për të rrëfyer me gjuhë skenike tematika vendore e globale, shkruan Koha.net. Qenë mbi 20 shfaqje e performanca që janë prezantuar në Qendrën Historike të Prizrenit./Katror.info
