Qendra Kinematografike e Kosovës ka publikuar zyrtarisht listën e projekteve që kanë kaluar fazën e parë të shqyrtimit administrativ, në kuadër të thirrjes publike për mbështetjen e projekteve filmike për vitin 2025, e cila ishte hapur më 22 maj 2025, shkruan Katror.info.
Sipas njoftimit të QKK-së, menjëherë pas mbylljes së afatit për aplikim, është formuar Komisioni i Hapjes së Konkursit, i cili ka shqyrtuar dokumentacionin e dorëzuar dhe ka verifikuar përmbushjen e kritereve administrative dhe teknike nga aplikuesit.
Lista e publikuar përfshin projekte të kategorive të ndryshme filmike, përfshirë filma të metrazhit të gjatë, të shkurtër, dokumentarë, filma për fëmijë, si dhe bashkëprodhime ndërkombëtare. Në këtë fazë, bëhet e ditur se projektet që nuk kanë plotësuar kriteret nuk do të vazhdojnë në procesin e mëtejmë të vlerësimit.
Mundesh me e lexu edhe…
Hapi i ardhshëm në këtë proces është emërimi i jurisë profesionale vlerësuese, e cila do të analizojë dhe vlerësojë përmbajtjen artistike dhe aspektet teknike të projekteve që kanë kaluar fazën e parë. Vlerësimi nga kjo juri do të jetë vendimtar për përcaktimin e projekteve që do të përfitojnë mbështetje financiare nga QKK./Katror.info
