- Shkruan Egzona Shala Kadiu
Si aktiviste për mbrojtjen e mjedisit, e di se asnjë kauzë nuk mund të ecë përpara pa zë, pa dritë dhe pa guximin për t’u treguar qytetarëve të vërtetën. Për mua, media është jo vetëm kanal komunikimi, por edhe mjet fuqizimi për komunitetin. Në këtë udhëtim, Katror Media ka treguar se si një medium i lirë dhe kreativ mund të bëhet aleat i fuqishëm për natyrën dhe për shoqërinë.
Gjatë këtyre tre viteve, Katrori nuk është kufizuar vetëm në raportime klasike ai ka sjellë një mënyrë të re të komunikimit të afërt, vizuale, me gjuhë të thjeshtë dhe të kuptueshme për secilin. Pikërisht kjo qasje ka bërë që çështje të rëndësishme, si mbrojtja e lumenjve dhe lufta kundër hidrocentraleve ilegale në parqet Kombëtare tona, të arrijnë deri te qytetarët, aktivistët e rinj dhe vendimmarrësit e të na sjellin rezultate pozitive.
Në betejën tonë për largimin e hidrocentraleve ilegale nga Parqet Kombëtar të Sharrit dhe për mbrojtjen e biodiversitetit, mbështetja e mediave si Katrori ka qenë vendimtare dhe e domosdoshme. Nëpërmjet raportimeve, storieve,artikujve e materialeve të tjera kreative, katrori i ka dhënë jehonë një zëri që shpesh është lënë në heshtje: zërit të natyrës.
Mundesh me e lexu edhe…
Partneriteti mes organizatave të shoqërisë civile dhe mediave është themelor për avokimin mjedisor. Si EcoZ, kemi parë nga afër se si një artikull, një video apo një fushatë e bërë me profesionalizëm dhe pasion mund të zgjojë ndërgjegjen e publikut, të nxisë debatin dhe të ushtrojë presion mbi institucionet.
Tre vite me Katrorin nuk janë vetëm një përvjetor i një mediumi janë tre vite dëshmi se mediat mund të jenë pjesë e zgjidhjes, kur kanë vullnetin të qëndrojnë pranë natyrës dhe qytetarëve.
Në kohën kur mjedisi është nën presion të vazhdueshëm, ne kemi nevojë për më shumë media të guximshme, të pavarura dhe të përkushtuara si Katrori.
Urime 3-vjetorin, dhe faleminderit që e keni kthyer informimin në një akt avokimi për vendin tone.
Përgatiti:
