Prishtina do të jetë skena e një nate të veçantë muzikore më 19 korrik, kur këngëtari dhe autori i njohur Armend Rexhepagiqi do të ngjitet në skenë për të prezantuar albumin e tij më të ri, “Dashni e Vjetër.” Ky koncert i shumëpritur shënon një rikthim të fuqishëm të artistit, i cili prej dekadash ka qenë një zë i rëndësishëm në muzikën shqiptare, shkruan Katror.info.
Me një karrierë të pasur dhe një repertor që ka lënë gjurmë në zemrat e dëgjuesve, Rexhepagiqi premton një mbrëmje të mbushur me muzikë, emocione dhe nostalgji. Përveç këngëve të reja nga albumi, ai do të interpretojë edhe disa nga hitet më të njohura të tij, që kanë shoqëruar breza të tërë dhe janë kthyer në pjesë të pandashme të kujtesës kolektive shqiptare.
Koncerti pritet të jetë më shumë se një performancë – një festë e vërtetë e muzikës së mirëfilltë dhe një takim i ngrohtë me publikun që ka ndjekur dhe dashur punën e tij ndër vite.
Biletat për këtë ngjarje janë në dispozicion online përmes faqes zyrtare www.rave-travel.com. Mos e humbni mundësinë të jeni pjesë e një nate që premton të mbetet gjatë në kujtesën e publikut./Katror.info
