Në fshatin Llukar, vetëm pak kilometra larg qendrës së Prishtinës, dekada më parë kishte filluar të funksionte Shtëpia e Kulturës, apo siç nihet sot “Qendra e Kulturës dhe Biblioteka në Llukar”.
Për dekada me radhë, kjo shtëpi ishte burim për informim dhe vetëdijesim kulturor për shumë fshatar të kësaj ane, që me plot mall kujtojnë ditët kur po merrnin pjesë dhe organizonin edhe vet aktivitetet kulturore. E njëjta, për shkak të menxhimit të dobët dhe pasojave të luftës ishte mbyllur.
Mirëpo, kjo hapësirë, nuk u harrua nga të gjithë. Ishin disa të rinj e ambiciozë nga Organizata Stereospace, që ia mësynë rivitalizimit të objektit në vitin 2022, për ta vendosur në funksion të plotë sot në vitin 2024.
“Mirë se erdhët në StereoSpace, kjo është një shtëpi e Kulturës në Llukar, është ndërtu në fillim të viteve të ’60-ta, sipas infove nga banorët që i kemi. Ka vazhdu të funksionojë si Shtëpi e Kulturës deri në fund të viteve të ’90-ta, pas luftës ku është shndërru në gërmadhë, mirëpo me një grup të shokëve dhe shoqeve që i kemi, kemi arritë me rikthy hapësirën”, u shpreh Isah Mustafa, nga organizata “Stereo Space” në vitin 2022, për Klan Kosova.
Ndërkaq sot, ka përfundu edhe rinovimi i Shtëpisë së Kulturës ne Llukar nga Komuna e Prishtinës dhe është bërë inagurimi i sallave dhe hapësirat e saj kreative.
“Rikthyem në funksion Qendrën e Kulturës dhe Bibliotekën në Llukar, e cila ka shërbyer si një pikë e rëndësishme kulturore deri vonë, kur u shkatërrua në mungesë të menaxhimit.
Kjo hapësirë, e dedikuar për artistët, nxënësit e shkollës fillore “Ganimete Tërbeshi”, dhe të gjithë ata që dëshirojnë të zhvillojnë talentet dhe pasionet e tyre, tani hap dyer të reja për krijimtari dhe edukim”, njoftoi kryetari Përparim Rama.
Ndërkaq rivitalizimit të hapësirës iu gëzua edhe drejtorja për Kulturë në Prishtinë, Sibel Halimi.
“Jashtëzakonisht e lumtur që sot e promovuam Qendrën Kulturore dhe Degën e Bibliotekës në fshatin Llukar. Kjo hapësirë do të shërbejë si një vend takimi për të rinjtë dhe të rejat që e duan artin dhe dëshirojnë ta zhvillojnë atë.
Një mundësi e shkëlqyer për të rinjtë të angazhohen, të krijojnë dhe të shprehin veten në një ambient kaq frymëzues”, u shpreh Halimi në rrjetet sociale.
Përpjekja e Stereospace
Organizata Stereospace, një grup muzicientësh dhe aktivistësh nga Prishtina, ka kohë që po bën përpjekje për rikthimin e jetës kulturore në fshat. Pak para fillimit të renovimit, ata organizuan aktivitete të shumta kulturore që u përcollën nga fshatarët.
Përpjekjet e Stereospace për rikthimin e Shtëpisë së Kulturës u përkrahën nga banorët, Komuna e Prishtinës, Ministria e Kulturës, si dhe organizata të ndryshme të vendit dhe ndërkombëtare.
Në pritje të përfundimit të renovimit të Shtëpisë së Kulturës, kjo organizatë po vijon përpjekjet për të bërë Shtëpinë e Kulturës të qëndrueshme, ndërsa ka bashkëbiseduar dhe intervistuar pjesëtarët e komunitetit në lidhje me problemet me të cilat përballen, si dhe për përparësitë e të jetuarit në fshat./Katror.info
Përgatiti:
