Revista Rolling Stone ka publikuar listën e 10 serialeve më të mira televizive për vitin 2023.
“Ishte një javë në fund të majit, kur Ted Lasso, The Marvelous Mrs.Maisel, Succession dhe Barry shfaqën episodet e tyre të fundit, dhe të gjitha këto seriale u zhdukën njëra pas tjetrës brenda pesë ditëve.
Midis asaj fundjave të ngarkuar të lamtumirës dhe rënies së biznesit që po ndodh, pasi çdo rrjet, transmetues dhe studio kupton se krijimi i më shumë se 500 serialeve me skenar në vit thjesht nuk është i qëndrueshëm, është e drejtë të pyesim veten nëse ajo periudhë maji shënoi fundin e një epoke”, shkruan revista Rolling Stone..
“Ndoshta po. Do të ketë më pak seri origjinale në të ardhmen, dhe për këtë arsye më pak hapësirë për krijuesit që të eksperimentojnë me llojin e serialeve të pazakonta që zënë disa nga vendet në listën tonë të 10 serialeve më të mira të vitit 2023. Por shumica e serialeve në listën e këtij viti nuk kanë përfunduar. Dhe disa duket se sapo kanë filluar rrugëtimin e tyre të gjatë dhe të paharrueshëm”, vazhdoi revista.
Rolling Stone e e cilësoi serialin Reservation Dogs, i cili trajton jetën e katër adoleshentëve që jetojnë në pjesën rurale të Oklahomas, të cilët ëndërrojnë të arratisen dhe të jetojnë në Kaliforni, si arritjen më të mirë të vitit. Bear (D’Pharaoh Woon-A-Tai), Elora (Kawennahere Devery Jacobs), Willie (Paulina Alexis) dhe Cheese (Lane Factor) e kuptojnë se u duhen para për t’i shpëtuar mjedisit dhe përpiqen t’i sigurojnë ato duke kryer një seri të krimeve të vogla në lagjen ku jetojnë.
Një seri aventurash gazmore u ndodhin atyre paralelisht. Seriali është gjithashtu një punë e madhe për komunitetin vendas amerikan, i cili ka pak ose aspak përfaqësim në kulturën e sotme pop. Sigurisht jo në mënyrën se si u portretizua nga krijuesit e serialit, bashkëshorti i këngëtarës Rita Ora, Taika Waititi dhe regjisori Sterlin Harjo.
“Nuk ka pasur kurrë një shfaqje si Reservation Dogs, një komedi rreth adoleshentëve vendas amerikanë që rriten në një rezervat në Oklahomën rurale. Le të shpresojmë se do të ketë një tjetër sezon.
Gjatë gjithë kohës, Reservation Dogs eci në litar rreth asaj se sa shumë donte ta trajtonte folklorin e mbinatyrshëm vendas si një faktor real në jetën e këtyre fëmijëve dhe sa shumë prej tij supozohej të ekzistonte në imagjinatën e tyre. Pavarësisht se çfarë zgjidhni të besoni, Reservation Dogs ishte magji e kalibrit më të lartë”, shpjegoi revista e njohur zgjedhjen e saj.
Në vendin e dytë është The Bear, i ndjekur nga Succession, Poker Face, The Last of Us, Beef, Blue Eye Samurai, Cunk on Earth, Somebody Somewhere dhe Party Down./Katror.info