Në Kosovë dhe në Shqipëri ka rritje evidente të interesimit për blerje të patundshmërive, vlerësojnë njohësit e kësaj fushe, raporton Ekonomia Online.
Krenar Batusha nga kompania Pro Real Estate bëri të ditur se kanë pasur një rritje prej 24 për qind në shitje dhe 39 për qind në aspektin financiar, me gjithë sfidave me çmimet në rritje të banesave dhe ndërtimit.
“Këtë vit ka rritje të patundshmërisë. Rreth 24 për vqind kemi rritje. Në aspektin financiar, kemi rritje 39 për qind.
Ka pasur edhe sfida: rritja e çmimit të banesave dhe metrit katror në ndërtim. Ka pasur sfida për disa klientë të blejnë pronë”, tha Batusha.
Ai shtoi se interesimi i qytetarëve dhe investitorëve të huaj është në rritje, edhe pse vështirësitë për blerje janë shtuar për shkak të rritjes së normave të kredive dhe qirave.
“Rreth 8 për qind ka pasur rritje të interesimit në vit, kur ka kushtuar metra diku 800 – 900 euro Tani është 1200 – 1500 euro, varet nga vendi, por ka vlera shumë më të mëdha në qendër të Prishtinës, që është shumë e mirë për të investuar dhe të hollat të investohen në patundshmëri. Interesim ka vazhdimisht nga qytetarët. Ata kërkojnë kualitet, ndërtim më të mirë dhe kanë zgjidhje më shumë. Kemi edhe investitorë të huaj. Është bërë më vështirë të blihet prona sesa më herët. Janë rritur edhe përqindjet e bankave, metrat katrorë të banesave, qiratë. Është një vështirësi për ta, por çdoherë patundshmëria është një treg dhe zinxhir i tillë që shkon në rritje”, tha Batusha.
Ndërsa, në Shqipëri është duke shtuar interesimi për patundshmëri nga gjithë bota, përfshirë edhe Kosovën.
“Çmimet në zonën e Radhimës nisin nga 2,000 euro për metër katror, ndërsa në jug arrijnë mbi 4,000 euro”, tha Ejon Nimu nga projekti Jal Y Mar.
“Përveç projektit tonë që ne zhvillojmë për më shumë se një vit, kemi sjellë edhe tri projekte të reja. Interesimi është shumë i madh, pasi për të paktën trevjeçarin e fundit interesimi për Shqipërinë është rritur nga e gjithë bota, sikurse edhe nga Kosova. Interesimi është i madh për të investuar. Interesimi është për gjithë periudhës se janë projekte në ndërtim”, tha ai./EO/Katror.info
