Profesori i bujqësisë Imer Rusinovci ka theksuar rëndësinë e kultivimit të grurit në Kosovë, duke thënë se kjo kulturë vazhdon të mbetet ndër më kryesoret në bujqësinë vendore, me një pjesëmarrje prej 20 deri në 25 për qind në sipërfaqet e përgjithshme të punuara, së bashku me misrin.
Duke folur në emisionin “Mirëmëngjesi Kosovë” në RTK, Rusinovci bëri të ditur se sipas të dhënave nga Ministria e Bujqësisë, rreth 70 mijë hektarë janë të mbjella me grurë këtë vit.
Ai vlerësoi se sezoni aktual ka sjellë rezultate premtuese në rendiment, duke theksuar se:
Mundesh me e lexu edhe…
“Në shumicën e rasteve, prodhimi sillet nga 4 500 deri në 5 500 kilogramë për hektar, ndërsa në disa raste është arritur edhe 6 deri në 7 tonë për hektar. Mesatarja pritet të jetë rreth 5 tonë për hektar.”
Aktualisht, fushata e korrje-shirjeve është në kulm dhe, sipas Rusinovcit, gjendja e grurit është e mirë në të gjitha rajonet, falë kushteve të favorshme agroekologjike dhe përmirësimit të teknikave bujqësore nga fermerët.
“Në Dukagjin procesi ka përfunduar pothuajse tërësisht, ndërsa në Rrafshin e Kosovës, veçanërisht në zonat më të larta, është ende në vijim. Presim që brenda pesë deri në gjashtë ditë të përfundojë korrja në gjithë vendin”, tha ai.
Megjithatë, profesori Rusinovci ngriti edhe një shqetësim:
“Krahasuar me vendet me ekonomi më të zhvilluar, Kosova ende ka produktivitet të ulët në sektorin e bujqësisë, gjë që kërkon më shumë investime dhe përkrahje për fermerët”.
Sipas tij, për të arritur rendimente më të larta dhe konkurrencë në treg, është e domosdoshme modernizimi i mëtejshëm i bujqësisë në vend./RTK/Katror.info
