Çmimet e naftës u stabilizuan me pak mbi 82 dollarë në tregjet ndërkombëtare falë një dollari më të dobët që mbështeti kërkesën.
Në tregun e Londrës, çmimi i një fuçie pas mesditës ishte 53 cent më i lartë se në mbylljen e djeshme të tregtisë dhe arriti në 82.13 dollarë. Dje e mbylli tregtinë me minus 1.17 dollarë.
Në tregun amerikan çmimi i një fuçie u rrit sot me 52 cent, në 77.16 dollarë. Dje e mbylli tregtinë në minus 1.23 dollarë.
Mundesh me e lexu edhe…
Tregtarët u shqetësuan dje nga kërcimi i stoqeve të naftës bruto në SHBA javën e kaluar, me 12 milionë fuçi, sipas një raporti të Ministrisë së Energjisë, për shkak të reduktimit të përpunimit në rafineri. Rezervat e benzinës ranë me 3.7 milionë fuçi.
Agjencia Ndërkombëtare e Energjisë (IEA) vlerësoi në një raport të publikuar të enjten se kërkesa globale për naftë po humbet vrullin, duke ulur paksa parashikimin e saj për rritjen e kërkesës këtë vit në 1.22 milionë fuçi në ditë.
Këtë vit, oferta duhet të rritet me 1.7 milionë fuçi në ditë, disi më e fortë se sa kishte parashikuar agjencia deri më tani.
Çmimet u mbështetën të enjten nga një dollar më i dobët, i cili forcon fuqinë blerëse. Indeksi, i cili mat vlerën e monedhës së gjelbër kundrejt një shporte me gjashtë monedha të tjera kryesore, ra 0.4 për qind pas një rënie të mprehtë të shitjeve me pakicë në SHBA.
Organizata e Vendeve Eksportuese të Naftës (OPEC) njoftoi veçmas se të mërkurën çmimi i një fuçie të shportës së naftës të anëtarëve të saj ishte pothuajse i pandryshuar dhe arriti në 82.52 dollarë. /Katror.info
Përgatiti:
