Përvojën e performimit në skena të huaja e studimet në Universitetin Qendror të Michiganit në Amerikë po i përdor si përvojë për të kontribuuar në fushën muzikore të vendit.
Pianistja kosovare, Adea Badivuku ka përvjelur mëngët për organizimin e festivalit i cili synon të sjellë inovacion në skenën kulturoro-artistike, “Shadows”.
Si ide e konceptuar për gërshetim të artistëve vendor e të huaj, ky festival tashmë do të nisë rrugëtimin me edicionin e parë në Galerinë e Fakultetit të Arteve më 22-28 qershor.
Mundesh me e lexu edhe…
“Inspirimi ka ardh’ nga eventet dhe ekspozitat e shumta qe kam pas rastin të vizitoj dhe të marr pjesë në Amerikë. Mbi të gjitha synimi ishte të realizojmë një festival ndërdisiplinor dhe t’i ofrojmë publikut një eksperiencë gjithëpërfshirëse”, thotë Badivuku për Katror Media.
Programi është kuruar që të ketë gjithëpërfshirje artistike, duke përfshirë mbrëmje muzikore, ekspozita e panele diskutimi.
Hapja do të kurorëzohet nga koncerti në piano i Adea Badivukut dhe në violinë të Meriem Badivuku. Pastaj do të prezantohet instalacioni audio – vizuel gjithëpërfshirës nga Deniz Caglarcan dhe koleksioni i pikturave në vaj nga Gunes Caglarcan.
Koncertet do të vazhdojnë rrugëtimin edhe me pjesëmarrjen e Ceyla Ganiyeva dhe Deniz Caglarcan nga Turqia, ndërkaq nga artistët vendorë do të performojnë Arta Jashari, Zana Abazi, Andi Duraku e Meriem Badivuku.
“Shadows’ është një kompozim i ndërthurur nga Deniz Caglarcan, në të cilin gërshetohen pikturat, instalacioni audio-vizual gjithëpërfshirës si dhe koncertet instrumentale. Quhet kështu meqenëse pasqyron magjepsjen se si njerëzit janë të lidhur mes veti në shkalla të ndryshme të statusit social”, tregon tutje për Katror Adea Badivuku.
Tutje ajo tregon edhe për punëtoritë, në të cilat do të marrin pjesë Deniz Caglarcan kompozitor i bazuar ne Los Angeles, Ceyla Ganiyeva violiniste nga Turqia dhe Gunes Caglarcan piktor nga Turqia.
“Të tre artistët së bashku me mua do të japin ligjeratë rreth temave të ndryshme të specifikuara në program. Këto prezantime do të ofrohen për studentët dhe gjithë të interesuarit në punëtoritë që do të realizohen në Akademinë e Muzikës”, përfundon Badivuku.
Festivali “Shadows” mbështetet nga Ministria e Kulturës, Rinisë dhe Sportit, përkrahet nga Universiteti i Prishtinës, Komuna e Vushtrrisë dhe Instituti “Yunus Emre”. /Katror.Media
Përgatiti:
