Një mister mjekësor i zbuluar për herë të parë në vitin 1972 është zgjidhur pas gati gjysmë shekulli hulumtimesh. Studiues nga Mbretëria e Bashkuar dhe Izraeli kanë identifikuar një sistem të ri të grupeve të gjakut, të quajtur “MAL”, duke publikuar rezultatet e tyre në një studim të vitit 2024, percjell TAR.
Historia nisi kur mjekët analizuan gjakun e një gruaje shtatzëne dhe zbuluan se qelizave të saj të kuqe u mungonte një molekulë e quajtur AnWj, e pranishme te 99.9% e njerëzve.
Pas dekadash kërkimesh, studiuesit zbuluan se kjo molekulë lidhet me një proteinë shumë të vogël të quajtur MAL, duke e emërtuar sistemin e ri të grupeve të gjakut sipas saj.
Mundesh me e lexu edhe…
Louise Tilley, hematologe në Shërbimin Kombëtar Shëndetësor të Britanisë, e cila ka studiuar këtë fenomen për afro 20 vite, tha se ky zbulim është “kulmi i një pune të gjatë ekipore” dhe se do të ndihmojë në ofrimin e kujdesit të specializuar për pacientët me grupe të rralla gjaku.
Zbulimi është i rëndësishëm për shkak të ndikimit në transfuzionet e gjakut. Nëse qelizat e kuqe nuk përputhen me antigjenet e trupit, transfuzioni mund të shkaktojë reaksione të rrezikshme për jetën.
Ekipi kërkimor arriti të konfirmojë përfundimisht zbulimin duke futur gjenin MAL në qelizat që nuk shprehnin antigjenin AnWj, duke rikrijuar me sukses molekulën e munguar. Kjo u mundëson mjekëve të testojnë pacientët dhe të përcaktojnë nëse ky grup i rrallë gjaku është i trashëguar ose lidhet me ndonjë gjendje tjetër shëndetësore.
Ekspertët besojnë se ky zbulim mund të shpëtojë jetë, duke lehtësuar identifikimin e rasteve të rralla dhe sigurimin e transfuzioneve të sigurta. /Katror.info
Përgatiti:
