Vendimi i Qeverisë në detyrë për të miratuar dhe proceduar përpara Kuvendit projektligjin për buxhetin e vitit 2026 ka nxitur reagime nga organizatat e shoqërisë civile.
Instituti GAP dhe përfaqësuesi i KDI-së, Eugen Cakolli, kanë ngritur shqetësime për ligjshmërinë e këtij procesi, duke e cilësuar atë si në kundërshtim me Kushtetutën dhe ligjet në fuqi, raporton Telegrafi.
Në reagimin e Institutit GAP thuhet se procedura e ndjekur nga Qeveria në detyrë bie ndesh me Ligjin për Qeverinë dhe me aktgjykimin e Gjykatës Supreme, pasi në mbledhje kanë votuar persona që janë tashmë të certifikuar si deputetë.
Mundesh me e lexu edhe…
Sipas GAP-it, kjo situatë krijon papajtueshmëri ligjore, pasi një person nuk mund të ushtrojë njëkohësisht dy funksione – atë të deputetit dhe të anëtarit të Qeverisë.
“Për të qenë procesi i ligjshëm, nënshkruesit e projektligjit është dashur të jenë zëvendëskryeministri dhe ministrat që nuk janë njëkohësisht deputetë në këtë legjislaturë. Çdo veprim që e anashkalon këtë parim cenon vlefshmërinë e vet ligjit për buxhetin”, thuhet në reagim.
Instituti paralajmëron se një veprim i tillë rrezikon jo vetëm ligjshmërinë e buxhetit, por edhe stabilitetin institucional dhe financiar të vendit, duke shtuar se buxheti është miratuar pa një qasje gjithëpërfshirëse dhe në një periudhë zgjedhore.
Ndërkaq, Eugen Cakolli nga KDI ka theksuar se me këtë veprim po krijohet një “situatë absurde dhe paradoksale”, pasi disa prej atyre që miratuan buxhetin në Qeveri tash janë deputetë që do ta votojnë të njëjtin dokument në Kuvend.
Sipas tij, kjo përbën “konflikt të pastër interesi” dhe një shkelje të ligjit të paraqitur si veprim popullor në emër të qytetarëve.
“Çështja nuk është te buxheti, por te mënyra si po shkelet ligji në emër të tij. Po përzihet qëllimisht ligjshmëria me populizmin, për ta bërë të padukshme shkeljen”, ka deklaruar Cakolli, duke paralajmëruar se një praktikë e tillë mund të hapë rrugë për shkelje të tjera në të ardhmen./Telegrafi/Katror.info
