Është nënshkruar në Emiratet e Bashkuara Arabe, marrëveshja e investimit për lidhjen nënujore të rrjetit të shpërndarjes së energjisë me Italinë në detin Adriatik, si edhe për investimet në rritjen e prodhimit nga burimet e rinovueshme në Shqipëri, ndërmjet Qeverisë së Republikës së Shqipërisë, Qeverisë së Republikës së Italisë dhe Qeverisë së Emirateve të Bashkuara Arabe, shkruan Albanian Post.
Marrëveshja, e cila për palën shqiptare u nënshkrua nga Zv/kryeministrja dhe Ministrja e Infrastrukturës dhe Energjisë, Belinda Balluku, bashkon vendet në një aleancë strategjike për energjinë e rinovueshme.
Më herët, gjatë fjalës së tij në Samit, Kryeministri tha se marrëveshja do të shërbejë për të rritur kapacitetin e Shqipërisë si një lojtar kyç në rajon, mbështetur në prodhimin e saj me 100 % energji të ripërtëritshme.
Mundesh me e lexu edhe…
Sipas kryeministrit shqiptar, Edi Rama, nënshkrimi i një marrëveshjeje me Italinë dhe Emiratet e Bashkuara Arabe, në fushën e energjisë, sa i takon shtrirjes së kabujve nënujorë në Adriatik, është një hap i rëndësishëm për gjithë rajonin.
Gjatë një fjale në kuadër të Javës së Qëndrueshmërisë në Abu Dhabi, Rama theksoi se falë dijeve dhe eksperiencës së Emirateve të bashkuara Arabe, po diversifikohet dhe transformohet sektori energjetik në vend.
“100% e energjisë të prodhuar nga Shqipëria është e përftuar nga burime të ripërtëritshme”, përshkroi kryeministri gjatë fjalës së tij. “Marrëveshja që do të nënshkruajmë sot për shtrirjen e kabujve nënujorë me Italinë do të rrisë kapacitetet e Shqipërisë. Është një hap i rëndësishëm për rajonin dhe Evropën, që nuk do të ishte arritur pa mbështetjen e Emirateve”.
Sipas tij, partneriteti me Emiratet në fushën e energjisë është shumë i rëndësishëm për një rajon, që shumë lufta e gjakderdhje i kanë dhënë formë të shkuarës dhe dëshira e përbashkët për të qenë pjesë e Bashkimit Evropian duhet mbështetur me nisma e hapa konkrete për të tejkaluar të shkuarën.
Në ceremoninë e nënshkrimit ishin të pranishëm Kkryeministri Edi Rama, Kryeministrja e Italisë Giorgia Meloni, Presidenti i Emirateve të Bashkuara Arabe Sheikh Mohamed bin Zayed, si dhe përfaqësues të qeverive të vendeve përkatëse.
“Nëse duam të bëjmë një tranzicion real dhe të qëndrueshëm energjetik, duhet të sigurohemi që ai të arrihet me infrastrukturë adekuate”.
Kështu e përcaktoi çështjen kryeministrja italiane, Giorgia Meloni, në fjalimin e saj në Javën e Qëndrueshmërisë në Abu Dhabi.
“Jam e sigurt se zhvillimi i ndërlidhjeve mund të jetë çelësi i një diplomacie të re energjetike për të shumëfishuar mundësitë për bashkëpunim mes nesh dhe për të gjeneruar përfitime të përbashkëta për të gjithë. Me këtë qasje, Italia dëshiron të bëhet një qendër strategjike për flukset energjetike midis Evropës dhe Afrikës”.
Një infrastrukturë për prodhimin dhe transportin e energjisë së rinovueshme nga Shqipëria në Itali: kjo është tema e një marrëveshjeje që do të nënshkruhet nga Italia, Shqipëria dhe Emiratet e Bashkuara Arabe në margjinat e samitit të Javës së Qëndrueshmërisë në Abu Dhabi, siç ka njoftuar vetë pala shqiptare, përmes kryeministrit Edi Rama.
“Vlera e infrastrukturës – shpjegoi Rama duke folur për shtypin italian përpara samitit, ku merr pjesë edhe kryeministrja Giorgia Meloni – është rreth një miliard euro dhe do të funksionojë maksimumi për tre vjet”.
“Unë personalisht jam krenare për këtë iniciativë, e cila tregon në mënyrë të prekshme se si mund të ndërtohen forma të reja bashkëpunimi edhe mes partnerëve që mund të duken të largët, të paktën gjeografikisht”.
Kështu foli kryeministrja Meloni, në fjalimin e saj në Javën e Qëndrueshmërisë në Abu Dhabi për marrëveshjen mes Italisë, Shqipërisë dhe Emirateve të Bashkuara Arabe, të nënshkruar me presidentin e Emirateve Mohammed bin Zayed dhe kryeministrin shqiptar Edi Rama, për prodhimi i energjisë së gjelbër në Shqipëri dhe transporti drejt Italisë.
“Një projekt ambicioz midis dy brigjeve të Adriatikut”, e përkufizoi Meloni, “një ndërlidhje e re energjetike, për të prodhuar energji të gjelbër në Shqipëri dhe për të eksportuar një pjesë të saj në Itali, falë një kablloje nëndetëse në Adriatik. Një projekt që përfshin tre qeveritë tona, si dhe sektorët tanë privatë dhe operatorët tanë të rrjetit”.
Çfarë përmban marrëveshja?
Italia, Shqipëria dhe Emiratet e Bashkuara Arabe nënshkruan të mërkurën një marrëveshje me vlerë të paktën 1 miliard euro për të ndërtuar një ndërlidhje nënujore për energjinë e rinovueshme në të gjithë Detin Adriatik.
“Ne besojmë fuqishëm në këtë projekt që përfshin tre qeveritë tona, si dhe sektorin tonë privat dhe operatorët e rrjetit”, tha kryeministrja italiane Giorgia Meloni ndërsa shpalli marrëveshjen në Samitin Botëror të Energjisë në Abu Dhabi.
Partneriteti trepalësh – i cili synon të prodhojë energji të gjelbër në Shqipëri dhe ta eksportojë atë në Itali përmes kabllove nënujore – do të përfshijë operatorin italian të rrjetit Terna dhe Kompaninë Kombëtare të Energjisë së Emirateve të Bashkuara Arabe (TAQA), tha kryeministri shqiptar Edi Rama.
Kryeministri shqiptar shtoi se infrastruktura do të lidhë portin shqiptar të Vlorës me rajonin jugor italian të Puglia-s, pika më e afërt mes dy vendeve dhe pritet të funksionojë brenda një maksimumi prej tre vjetësh./Katror.info
Përgatiti:
