Shumë fëmijëri u shënuan nga Pipi Çorapegjata, një personazh që të gjithëve u pëlqente ta shikonin dhe shijonin aventurat e vajzës së djallëzuar dhe me pika në fytyre. Personazhin e saj, në serialin e filmuar 54 vite më parë, e luante atëbotë 10-vjeçarja, Inger Nilsson.
Pipi Çorapegjata ose emri i plotë Pippilotta Viktualia Rullgardina Krusmynta Efraimsdotter Långstrump është vajza më e famshme në botë, ajo ka pika në fytyrë dhe gërsheta të kuqe që qëndrojnë drejt, kundërshton të rriturit dhe ka sjellje jo shumë të mira.
Ajo jeton pa prindërit e saj në një shtëpi të quajtur Villa Villekulla së bashku me kalin e saj me pika Lilla Gubben dhe majmunin Z. Nilsson, dhe miqtë e saj më të mirë janë Timmy dhe Annika.
Mundesh me e lexu edhe...
Inger Nilsson (63), e njohur më së shumti për rolin e vajzës me flokë të kuqe, pas rolit të saj në serial dhe tre vazhdimeve të filmit për “Pippa Longstocking” të xhiruar në vitet 1969 dhe 1970, luajti disa role të vogla. Edhe sot, kur shohim fotot e saj, dallojmë vogëlushen lozonjare.
Sot Inger punon si sekretare në Stokholm dhe i përkushtohet familjes, bashkëshortit dhe dy fëmijëve dhe herë pas here pranon disa role të vogla. Kështu në vitin 2000 ajo u shfaq në filmin “Gripsholm” dhe që nga viti 2007 mund ta shikojmë në kanalin televiziv gjerman ZDF në rolin e patologes Ewa në serialin kriminal “Der Kommissar und das Meer”. Më shumë se dhjetë vjet më parë, ajo mori pjesë në reality show “Kändisdjungeln” në të cilin disa njerëz të famshëm qëndrojnë në xhungël për disa javë.
Filmit dhe serialit “Pippi Longstocking” i ka paraprirë romani me të njëjtin emër dhe që është romani më i famshëm i autores së njohur suedeze për fëmijë Astrid Lindgren. Vepra është e njohur në të gjithë botën dhe është përkthyer në 92 gjuhë botërore. Në kohën kur u shkrua dhe u botua romani, ai u konsiderua i diskutueshëm, sepse portretizonte një vajzë që sfidonte rregullat dhe sillej në mënyrë të egër dhe të pazakontë si një heroinë.
Para popullaritetit të saj, Pippi ishte objekt debatesh mes të rriturve. Kritikët argumentuan se 10-vjeçarja me forcë gjigante, e cila jeton vetëm në rezidencën Kunterbunt dhe lejohet të bëjë çfarë të dojë, mund të bëhet një model i keq për fëmijët. Përveç kësaj, ata u ankuan se gjuha e përdorur ishte e drejtpërdrejtë dhe vulgare dhe se libri ishte demoralizues. /Katror.info
Përgatiti:
