Kush e zgjedh papën e ri?

Papa Françesku ka ndërruar jetë në moshën 88-vjeçare, pas 12 vitesh si udhëheqës shpirtëror i Kishës Katolike Romake.

Vdekja e tij ka vënë në lëvizje procesin shekullor për zgjedhjen e një Pape të ri, shkruan BBC, përcjell Katror.info.

Cili është roli i Papës?

Papa është udhëheqësi më i lartë shpirtëror i Kishës Katolike. Katolikët romakë besojnë se ai përfaqëson një vijë të pandërprerë trashëgimie që shkon deri te Jezu Krishti. Ai konsiderohet pasardhësi i gjallë i Shën Pjetrit – dishepulli më i afërt i Krishtit dhe udhëheqësi i parë i Kishës.

Si i tillë, Papa ka autoritet të plotë mbi mbarë Kishën Katolike dhe është figurë qendrore për rreth 1.4 miliardë katolikë në gjithë botën. Mësimet dhe qëndrimet e tij ndikojnë drejtpërdrejt në doktrinën dhe praktikat fetare të besimtarëve.

Edhe pse katolikët e konsultojnë shpesh Biblën për udhëzime shpirtërore, ata i drejtohen gjithashtu mësimeve të Papës për të kuptuar më mirë besimin dhe mënyrën e jetesës sipas fesë.

Sot, rreth gjysma e të gjithë të krishterëve në botë janë katolikë romakë. Ndërkohë, degë të tjera të krishterimit – si protestantët dhe ortodoksët, nuk e njohin autoritetin e Papës.

Papa jeton në Vatikan, shteti më i vogël dhe më i pavarur në botë. Ai ndodhet brenda kryeqytetit italian, Romës.

Papa nuk merr pagë, por të gjitha shpenzimet e tij të udhëtimit dhe jetesës mbulohen nga Vatikani.

Çfarë ndodh kur Papa vdes?

Funerali i Papës ka qenë tradicionalisht një ceremoni e madhe dhe e ndërlikuar, por Papa Françesku ka miratuar një plan për ta bërë këtë proces më të thjeshtë.

Ndryshe nga paraardhësit e tij, të cilët zakonisht varroseshin në tre arkivole të vendosura njëra brenda tjetrës (prej selvie, plumbi dhe lisi), Papa Françesku ka zgjedhur një arkivol të thjeshtë druri, të veshur me zink nga brenda.

Ai gjithashtu ka hequr dorë nga tradita e vendosjes së trupit të Papës mbi një platformë të ngritur të njohur si katafalk – në Bazilikën e Shën Pjetrit për homazhe publike.

Në vend të kësaj, të pranishmit do të kenë mundësinë të nderojnë Papën ndërsa trupi i tij qëndron brenda arkivolit, me kapakun e hapur.

Papa Françesku do të jetë i pari Papë në më shumë se një shekull që nuk do të varroset brenda Vatikanit.

Ai do të prehet në Bazilikën e Shën Marisë së Madhe, një nga katër bazilikat kryesore papnore në Romë.

Bazilikat janë kisha të cilat kanë marrë status dhe privilegje të veçanta nga Vatikani, dhe ato kryesore kanë një lidhje të ngushtë me Papën.

Kush e zgjedh Papën e ri?

Papa i ri duhet të zgjidhet nga ‘Kolegji i Kardinalëve’, i cili përbëhet nga zyrtarët më të lartë të Kishës Katolike.

Të gjithë kardinalët janë burra, të cilët emërohen drejtpërdrejt nga Papa dhe janë zakonisht peshkopë të shuguruar.

Aktualisht, ka 252 kardinalë katolikë, prej të cilëve 138 janë të aftë të votojnë për Papën e ri. Kardinalët e tjerë janë mbi 80 vjeç dhe nuk mund të votojnë, por mund të marrin pjesë mbi diskutimet se kush mund të zgjedhet Papa i ri.

Si zgjidhet Papa dhe çfarë është konklava?

Kur Papa vdes (ose jep dorëheqjen, siç ndodhi në rastin e Papës Benedikti XVI në vitin 2013), kardinalët thirren për një mbledhje në Vatikan, e ndjekur nga konklava – procesi i zgjedhjes së Papës.

Gjatë periudhës mes vdekjes së Papës dhe zgjedhjes së pasardhësit të tij, ‘Kolegji i Kardinalëve’ drejton Kishën.

Zgjedhja mbahet në fshehtësi të plotë brenda Kapelës Sixtine, e njohur për pikturat e Mikelanxhelos.

Çdo kardinal voton për kandidatin e tij të preferuar deri sa të arrihet një fitues. Ky proces mund të zgjasë disa ditë, dhe ndonjëherë ka marrë javë ose muaj në të kaluarën. Ka pasur raste kur disa kardinalë kanë vdekur gjatë konklavës.

Zgjedhja publikohet përmes tymit që del nga djegia e fletëve të votimit. Tym i zi tregon se nuk ka pasur një fitues, ndërsa tymi i bardhë tregon që Papa i ri është zgjedhur.

Si bëhet publik vendimi për Papën e ri?

Pasi ngrihet tymi i bardhë, Papa i ri normalisht shfaqet brenda një ore në ballkonin me pamje nga Sheshi i Shën Pjetrit. Kardinali i lartë pjesëmarrës në konklavë do të shpallë vendimin me fjalët “Habemus Papam” – latinisht për “ne kemi një Papë”. Më pas ai do të prezantojë Papën e ri me emrin e tij të zgjedhur papal, i cili mund të jetë ose jo emri i tij origjinal.

Teorikisht, çdo burrë katolik romak që është pagëzuar mund të konsiderohet për zgjedhjen e Papës.

Megjithatë, në praktikë, kardinalët preferojnë të zgjedhin një nga të tyret.

Kur Papa Françesku, i lindur në Argjentinë, u zgjodh në konklavën e mëparshme në vitin 2013, ai u bë Papa i parë që erdhi nga Amerika e Jugut, një rajon që përbën rreth 28% të katolikëve të botës.

Megjithatë, parimi historik sugjeron se kardinalët janë shumë më të prirur të zgjedhin një evropian dhe veçanërisht një italian.

Nga 266 papët që janë zgjedhur deri tani, 217 kanë qenë nga Italia. /Katror.info