Një sinjalizuese e Tesla-s, e cila ka luftuar Elon Musk-un dhe kompaninë e tij nëpër gjykata për vite me radhë, ka fituar raundin më të fundit të një beteje të gjatë ligjore, raporton BBC News, transmeton KosovaPress.
Inxhinierja Cristina Balan humbi punën pasi ngriti shqetësime për sigurinë në vitin 2014 në lidhje me një defekt në dizajn që mund të ndikonte në frenimin e makinave.
Pretendimi i saj për shpifje kundër kompanisë dukej se kishte marrë fund kur një gjykatës konfirmoi një vendim arbitrazhi që e hodhi poshtë çështjen – por një panel gjyqtarësh të apelit në Kaliforni e ka përmbysur këtë vendim në favor të saj.
Mundesh me e lexu edhe…
Ajo i tha BBC News se tani dëshiron të përballet me Elon Musk-un dhe Tesla-n në një gjykatë të hapur.
Tesla nuk ka dhënë ndonjë koment pas kërkesës për përgjigje. Balan tha se beson se çështja do të kthehet në thelb në pikën zero dhe se mund të nisin procedura të reja.
“Shpresojmë që do të fillojmë një padi të re dhe do të kemi mundësinë të përballemi me Elon Musk-un përpara një jurie dhe gjykatësi”, tha ajo.
Inxhinierja ishte dikur aq e rëndësishme në Tesla sa inicialet e saj ishin gdhendur në bateritë brenda automjeteve Model S.
Në një intervistë me BBC News vitin e kaluar, ajo tha se është e vendosur të vërtetojë pafajësinë e saj për hir të djalit të saj.
Ajo gjithashtu zbuloi se ishte në fazën e shërimit nga kanceri i gjirit, faza 3B, dhe shqetësimi i saj më i madh ishte se mund të mos jetonte për të parë ditën e fundit në gjyq.
Balan pretendoi se ishte e shqetësuar për faktin që tapetet po përthyheshin nën disa pedale në modelet e Tesla-s, duke krijuar një rrezik për sigurinë.
Ajo tha se menaxherët hodhën poshtë shqetësimet e saj, u bënë armiqësorë dhe më pas ajo humbi punën.
Më pas ajo fitoi një çështje për largim të padrejtë nga puna – por kjo rezultoi të ishte vetëm fillimi i një rruge të gjatë nëpër gjykata.
Balan u akuzua publikisht nga Tesla për përdorimin e burimeve të saj për një “projekt sekret” – akuza që përbëjnë përvetësim të paligjshëm, një krim sipas ligjit amerikan.
Ajo i ka mohuar vazhdimisht akuzat dhe vendosi të ngrejë një padi për shpifje kundër kompanisë në vitin 2019.
“Unë dua të pastroj emrin tim”, i tha ajo BBC News vitin e kaluar.
“Do doja që Elon Musk të kishte mirësinë të kërkonte ndjesë”.
Një gjykatë më pas vendosi që çështja e Balan të trajtohej përmes arbitrazhit, sipas një kontrate që ajo kishte nënshkruar kur punonte për Tesla-n.
Arbitri vendosi në favor të kompanisë dhe Musk-ut, duke hedhur poshtë pretendimet e saj, për shkak të afatit ligjor të shtetit të Kalifornisë – që do të thotë se kishte kaluar shumë kohë që nga momenti i deklaratave të pretenduara shpifëse.
Tesla e riktheu çështjen në një gjykatë të distriktit në Kaliforni për të konfirmuar vendimin.
Megjithatë, Balan e apeloi këtë vendim dhe gjyqtarët nga Gjykata e Apelit të SHBA-së për Rrethin e Nëntë vendosën në favor të saj – në thelb duke vendosur që gjykata e Kalifornisë nuk kishte juridiksion për të dhënë vendimin e saj.
Ata urdhëruan që konfirmimi i vendimit të arbitrazhit të anulohet dhe që gjykata e distriktit ta hedhë poshtë çështjen për shkak të mungesës së juridiksionit./Katror.info
Përgatiti:
